Tang ha Meghalaya kiba la ngop ha u drok ki la kot 2 lak, ong u Dr. Bishnoi, u heh Pulit ka Meghalaya

Nongpoh, Jylliew 15: Kum shi bynta na ka thong jong ka Jan Bhagidari Even kiba dei shaphang ka G20, National Education Policy bad ka Foundation of Literacy and Numeracy bad kynthup ruh halor ka jingktah jong u drok ha ka jylla, ka tnad Ri Bhoi Police ha ka jingaitrei lang bad ka Union Christian College UCC Umbir mynta ka sngi ki la lah ban pynlong ïa ka prokram ai jinghikai kaba dei halor ka jingktah jong u Drok ba la ai halor ka phang ‘Drug Abuse bad Illicit Trafficking’ ha kaba la pynlong ha UCC Auditorium Hall, Umïam.
Ha kane ka prorkam ai jinghikaila wan ban shim bynta da ki spah ngut ki khynnah skul kiba kynthup na ka James Memorial Higher Secondary School, St Franchise D’Assisi Higher Secondary School bad Union Christian Hr. Sec.Schooll. Umbir.
U heh pulit ka jylla Meghalaya, u Dr. LR Bishnoi, Director General of Police, Meghalaya u la wan ruh ban shim bynta kum u kongsan bad la sakhi lang ruh da ka jingdon lang u SP ka Ri Bhoi, u Giri Prasad, u Bah S Pasleiñ, DSP Ribhoi, Dr. RM Manih, Principal UCC, Bah Arphra Banshan Kharkongngor, PO, NSS, lem bad kiwei kiwei ki heh ophisar na ka tnad police, ki nonghikai bad ki khynnah skul.
Haba ai jingkren ha kane ka sngi kum u kongsan, u Dr. LR Bishnoi, u la ong ba ka tnad Pulit ka jylla ka la shim khia bha ban ïa khun pyrshah ïa ka jingdang kynrei ki drok hapoh ka jylla Meghalaya bad dei namar kane ka daw na ka liang ka tnad Pulit ka la shim khia ban pynlong ïa kum kine ki jaid prokram ha kylleng ki jaka jong ka jylla na ka bynta ban pynsngewthuh ïa ki samla halor ka jingktah jong u drok.
“Kumba long haduh mynta ki la don haduh 3 klur tam kiba la ngop ha drok ha kylleng ka ri India bad tang ha ka jylla Meghalaya ki la don haduh 2 lak kiba la ngap ha u drok” ong u Dr. Bishnoi bad bynrap ruh lada ngim don kata ka jingïatrei lang ban pynduh jaid ïa kine ki jingdih ba sniew ka jingma ka ap ïa kiba bun ki longïing longsem bad kumjuh ruh wat ha ka imlang ka sahlang, u la bynrap.
U la ïathuh ruh ba ki don ar bynta ki jaid drok kita ki kynthup ïa u drok ba pynmih na ki kynja jingthung (Narcortic) bad uwei pat u dei uba pynmih lyngba ki jingshna ha ki kynja laboratory ba la tip kum ka Synthetic uba kham don jingma nalor u drok ba pynmih na ki kynja jingthung.
Shuh shuh, haba khot ba wer ban ïa trei lang na ka bynta ban pynduh jaid ïa u drok uba la ktah bha ha ka imlang ka sahlang, u Dr. Bishnoi u la kyntu ruh ïa ki khun samla ba kim dei ban ktah ïa u drok, namar shisien ba ki khun samla ki la ngop ha u drok kane ka ktah ym tang ïa ki shimet bad ïa ka ing ka sem bad kan ktah ruh wat ïa ka lawei jong ka jylla bad ka ri, u la bynrap.
Ha kane ka sngi, hadien kane ka prokram ai jinghikai na ka bynta ki khynnah skul jong kitei ki 3 tylli ki skul, la ioh ruh ban ïa sakhi ïa ka Megha Shakti Drill ba la pyni da ka kynhun SF-10 Commando jong ki kynthei, ka jingthmu ban pyni ïa katei ka Drill ka long ban ai mynsiem ïa ki khynnah pule ki ba thrang ban long pulit ha ka lawei ban sa wan jong ki.