Nongstoiñ, Jylliew 20: U MLA bad MDC ka seng Congress na Nongstoiñ Constituency Bah Gabriel Wahlang, hynne ka sngi ba ar u la ong ba ka Indian National Congress kan ai jingkyrshan ïa ka seng National People’s Party (NPP) tang ha Khasi Hills Autonomous District Council (KHADC) ym ïa ka Sorkar MDA-II kaba ïalam da ka NPP ha ka jylla.
Haba ïakren bad ki nongthoh khubor u Bah Gabriel Wahlang u la ong, ba ka Congress ka kyrshan ïa ka NPP tang ha District Council na ka bynta ka bha ka miat ha kaba ïadei bad ka kolshor.
“Ka District Council ka ïapher na ka sorkar jylla, ha ka District Council ngi peit ïa ka bynta jong ka kolshor ki paidbah, kumta kam don satia kano kano ka lad ba ngin leit ai jingkyrshan ïa ka sorkar MDA”, u la ong.
Haba kylli la u Myntri Rangbah bad u President ka NPP ki la pan ïa kano kano ka jingjyrshan, u Bah Gabriel u la ong ba u Myntri Rangbah um shym la ai ktien eiei ha kaba ïadei bad ka jingpan jingkyrshan na ka Congress.
U MLA bad MDC ka seng Congress Nongstoiñ u la pyntip ruh ba ka seng Congress kan sa lum ïa ka jingïalang ha ka sngi Balang.
