Tang da ka lieng ba shna da u siej pyndonkam ki paidbah ban kam sha shilliang ka wah blei

Ranikor, ‘Nailur 15: Ka long kaei kaei kaba pyndiaw mynsiem bad buh ïa ki ha ki shibun bah ki jingeh namar tang na ka daw ka jingbym biang ki lynti ki synkien ki paidbah ki la hap ban shu shong da i lieng ba shu shna hi da kaba teh song lang ïa ki siej ha ka ban kam ïa ka wah blei na shilliang sha shilliang.
Halor kane ka jingjia ka la jia ha kawei ka shnong rit, ka shnong Thadteja ka dei ka shnong kaba hap hapoh jong ka Ranikor C&RD Block, South West Khasi Hills District bad kane ka shnong lah ban ong ba ka dei ka shnong kaba ha kyndong tam jong ka South West Khasi Hills District bad kaba jngai kumba 14 km na Civil Sub Division Ranikor.
Ki shnong ki hap markhap bad ki ar tylli ki District ka South West Khasi Hills District ki long ka Shnong Thadteja, ka Shnong Pormawdar, ka Nirang bad ka Armarsang ha kaba kine ki shnong ki mad ïa shibun ki jingeh tang namar bymdon ki lynti synkien khamtam ka surok kali bad ka jingkieng ban kam lyngba ïa ka wah blei.
Katkum ka jingïoh lum jingtip lyngba ka jingïathuh jong ki ‘riew rangbah na katei ka thaiñ la ong ba ki briew kum ha kine ki por lyiur lyngba ka jingwan jong u slap uba jur ki mad ïa ka jingeh ban kam ïa ka wah blei kaba heh khamtam eh ha ka por ba don ka jingwan hap u jong u slap uba jur ha kaba ki hap ban mat ïa ki jingeh ka long ha ka por ba pang ba shitom ki hap ban kit hi da ki lieng ba la shna hi da ki siej ban ïoh ban kit ïa ki nongpang.
Shuh shuh la ong ba ki don ruh ki nongrep kiba kwah ban leit die ïa ki mar rep ha ïew Maweit kum ki kynja soh hynrei ki shem jingeh shikatdei namar ki hap ban kit beit da i lieng siej iba rit bad kumjuh ruh haba ki thmu ban kit ïa ki khaw, ki jhur ki jhep pat ba la sop bha da ka plastik ban kit ha ki lieng siej ha ka por ba kam ha shilliang ïa ka wah blei namar lada ym sop bha da ka plastik ïa lehse lada dei um u khaw un sa jhieh lut bad um long shuh ban bam.
Ki la pynpaw ruh ba kane ka shnong ka mad jingeh ym tang ha ka lynti ka synkien hynrei kim don hi ruh wat ïa ka bording ne electric bad kumjuh ruh kim don hi ruh ïa ka jingïakren lyngba ki kor ki bor jong kane ka juk ne ki mobile phone.
Namarkata, halor kine na ka liang ki nongshong shnong ki la buh ka jingkyrpad ïa ka sorkar lyngba ki nongmihkhmat ban ai noh da ka jingkieng khnang ba ki paidbah jong kane ka dong ka thaiñ kin dup suk ha ka ïaid ka ïeng, ha ka kit ka bah khamtam tam eh ban pynkit ïa kiba pang ba shitom ba ka ymdon kano kano ka jingjia ba sngewsih nangne shakhmat namar lada shu kam na shilliang sha shilliang ïa ka wah blei tang da ki lieng ba la shna hi da ki siej kan shem jingeh bad ruh ka buh jingma ïa ki briew lada wan kynsan kynsan ka umsaw.