Ka la pynkyndit ïa uba bun balang,haba ka longkmie marwei, ka leit shong shah thngan, na ka bynta ka jingkwah surok bad katei ruh kam dei satia ka surok kaba rit, hynrei kaba jrong haduh 59 kilometre, kaba ïaid na Nongpoh, Umden sha Sonapur, ha ka jinglut kaba T.100 klur antad.
Kin bun ki ban kren beiñ, ki ban wohnia bad wat ki ban lyngngoh ruh ïa ka jingshlur jong katei ka longkmie marwei, ka kong Bindas.
Syiem kaba na ka shnong Mawlong Nongtluh jong ka Ribhoi District, ha kaba ka la nud ban ieh ïa la ki khun ki kti bad ban shah thngan, haduh san sngi kynthih, na bynta katei ka daw, kaba dei ïa ka ïap ka im jong ka thaiñ.
Ka jingshah thngan jong ka kong Bindas, ka pyni ruh sha u paidlang ka jylla, ba ka jingdawa ïa ka roi ka san, ka bha ka miat kam dei, tang ha ki MP/MLA/MDC, hynrei ka shong ha ka jinglen lade jong ngi shimet bad katei hi kan pynïoh ïa ka jingmyntoi ïa la ki jong ki jingdonkam bad wat ïa ki kam pynroi ha ka shnong bad ka thaiñ hi bad la ïohi ruh ba kito ki jingleit ïakren lane leit shah shondur ïalade sha Secreteriat, kumba kim don dor shuh, hynrei ka donkam ka jingshlur bad ka jingnud, lada dei ban shah thngan, kumba leh katei ka longkmie na Ribhoi.
Ngi kiba bun, ngi da tieng song eit, haduh katta katta ha kine ki sngi ban kren ïa ki jingdonkam lajong lane ïa ki jingdonkam jong ka shnong ka thaiñ bad ka daw, ka long ba ngi dei kiba ju thap ei bad bam ei, na ki kyrtong elekshon bad kumta, lada ki leh bha ne ki leh sniew ruh, ngim ju nud satia ban saham bad kane ka jingtieng pud, ka la ngam jylliew ha ka khleiñ syieng jong kiba bun ki nongshong shnong.
U MLA ka Nongpoh, u donbok, ba ka don kane ka longkmie, kaba ïoh ban phalup lem halor ki jingdkoh jong ka thaiñ hi baroh kawei bad kan jin da la donkam bha, ba kin don sa kiwei pat, ki ban shlur ban mih shakhmat, ban ïakren ïa ka jingsniew tasam ka surok bah NH 6 sha Umkiang Ratacherra, ka surok bah na Shillong sha Dawki bad kam dei tang kata, hynrei, ki don sa kiwei ki jingeh bad ki jingleh bym salia jong ki tnat sorkar jylla, ha kaba ki nongshong shnong, ki dei ban mih shakhmat, ban pyni ïa ka jingbitar jong ki, khlem da ïaleh pyrshah pat da ka jubor justi.
Lyngba ka jingdawa jong katei ka longkmie, ka la dei eh ruh, ïa ki sengbhalang lane ïa ki riew smat ban wad jingtip paidbah lane RTI, ba kin tih bniah noh, halor ka rukom pynpoi surok sha ki Constituency bapher bad la ka jingai bhah, ka ïahab ne ka noh shiliang bad lada ka don kaba kum katei, ka donkam sa kawei ka jingpyni bor lada dei da ka jingshah thngan ruh, namar ba u Myntri ka PWD lane u Myntri Rangbah lane uno uno u Myntri sorkar jylla, kim lah ban pynpur surok lut sha ki jaka leit bri leit sah, sha ki jaka leit painkhana, sha ki jaka leit shangkai pyngngad lane sha phyllaw jong ki nongkyrshan elekshon jong ki.
