Shillong, Naitung, 08: Ka jingïajia pud hapdeng ki Sirdarship, Elaka bad ki Shnong kiba don ha kylleng ka ri Khasi ka dang ïai bteng haduh kine ki sngi watla ka Khasi Hills Autonomous District Council (KHADC) ka la pyrshang ban wanrah ïa ka jingïasuk hapdeng ki arliang mamla da kaba thung ïa ka miej bishar khnang ban pynstet ïa kane ka kam.
U Executive Member i/c Elaka u Bah Jambor War haba jubab ïa ka jingkylli ba la wanrah da u Nongïalam jong ka Liang Pyrshah u Bah PN Syiem ha ka sngi kut jong ka Dorbar Lyuir jong ka Ïingdorbar Thawain ka Council ha ka sngi Thohdieng u la ïathuh ba ki don haduh 29 tylli ki jingïakajia pud hapdeng ki Sirdarship, Elaka bad ki Shnong kiba hap hapoh ka jingsynshar jong ka KHADC bad haduh mynta tang 6 tylli ki Hima kiba la lah ban pynkut noh ïa ka jingïakajia pud.
“Kiwei kiwei pat ki dang don hapdeng ka jingbishar jong ka Tribunal ba la thung da ka KHADC,” ong u Bah Jambor
War.
“Na ka liang jong ka KHADC ka la shim ïa ki lad ki lynti kumno ban peit ba yn dup lah ban pyndep noh kham kloi ïa ka jingïakajia hapdeng ki Sirdarship, Elaka bad ki Shnong. Lada don leilei kiba lah ban ïapynbeit da ka jingïasngewthuh jingmut ruh kan biang,” ong une u EM ka tnat Elaka ka KHADC.
