Shillong, Ïaïong 25: Ki heh sorkar ba peit ïa ka koit ka khiah, ki la pynpaw ka jingsngewkhia kaba jur ba ki longkmie ha ka jylla Meghalaya, kumba mar shiteng ki dang jied hi ban kha khun ha ïing. Katba sha kiwei pat ki jylla ka ri India ki longkmie kiba leit kha ha Hospital long haduh 90%.
Lah ban kdew hangne ba ka Meghalaya kadei kawei na ki jylla ha ri India kaba ka jingïap ki longkmie ha ka por ba kha khunlung ne kata kaba ki ong Mother Mortality Rate ka jur bha. Nangta ka Infant Mortality Rate ne ka jingïap ki khunlung ha ka por ba kha ka jur bha.
Ong ki Doktor kiba dei ha ka laiñ sumar ïa ki thei armet, ba ki longkmie kiba na nongkyndong ki kham jied ban kha hi ha ïing bad kane kadei kawei na ki daw kiba kyntiew ïa ka jingjur ka jingïap ki kmie ha ka por ba kha khunlung.
Ki la ïathuh ba ka sorkar India ka la pynmih bun ki skhim ban pynshlur ïa ki longkmie ba kin leit kha khun ha ki Hospital, khnang ba kin lait na ka jingma.
“Ha ki por mynshuwa te ka jingkha khun ha ïing ka dang kham shngaiñ, hynrei mynta te kam long shuh kumba long mynshuwa”, la ong ki Doktor. Ki la kyntu ïa ki paidbah ba kidei ban leit sha ki Sub Centre, ki PHC kiba don ha ki Shnong jong ki, khnang ba kin ïoh jingtip ïa ki lad jingsumar naduh ka por ba ki dang armet. Nangta ynda la kha khunlung ha ki Hospital ruh, lada don kano kano ka jingshitom, ki Doktor, ki Nurse ki la ïoh ban ïarap ïa ki.
Nalor ki Sub Centre, ki PHC, ki don ruh ki ASHA kiba ju leit rung sha ki ïing jong ki kynthei kiba dang armet ban pynsngewthuh ïa ki ba kin leit sha ki jaka sumar.
Dang shen ha ka Health Mela kaba la long ha Mairang ruh, na ka liang u Bah Metbah Lyngdoh, Speaker, ki la kren khia bha halor ka jingmlien ki Khasi ban kha khun ha ïing, da kaba ong ba ka juk ban kha khun ha ïing ka la leit, hynrei kane kadei ka juk kaba la dei ban leit kha khun ha ki Hospital, khnang ban lait na ka jingma jong ka jingim ka kmie bad i khun.
