“Tang 41 sngi ba nga la kular nga la pynïoh ka mang tyngka kaba T. 3 Klur”: Bah Hamlet

Shillong, Jymmang 08: Ka madan Mylliem Madan Ïing Syiem kan sa kylla dur bad kan dei kawei na ki madan ïalehkai football hapoh ka jylla kaban sa ïoh ban pynlong ïa kiba bun ki tournament kiba heh kum ka Meghalaya State League da ka jingtrei shitom u MLA ka thaiñ Bah Hamletson Dohling uba la pynïoh ïa ka mang tyngka kaba 3 klur tyngka ban shna ïa ka Gallery nalor ka jingpynbha ïa kane ka madan.
Ha ka sngi Saitjaiñ jong ka taïew ba lah dep, u Bah Bah Banteidor Lyngdoh Myntri ka tnad ki kam ïalehkai u la leit ban plie ïa u mawnongrim ban shna ïa ka Gallery nalor ka jingpynbha ïa ka madan ïalehkai jong ka Mylliem Madan Ïing Syiem ha ka jingdonlang u MLA ka thaiñ Bah Hamletson Dohling, Bah Bibatdor M Syiem Chief Engineer ka State Sports Council, Bah Hamphel Khyriem Rangbah Shnong, ki riew rangbah, ki nongshah khot sngewbha haduh ki paidbah nongshong shnong.
U Bah Hamletson Dohling haba ai jingkren u la ïathuh ba ha ki saw snem ba u la ong kum u MLA u la wanrah ïa ka skhim kaba kot sha ka 19 klur 74 lak tyngka tang ha ka liang ka kam ïalehkai.
“Tang saw snem kum u MLA nga la lah ban pynïoh ïa ka skhim sports kaba kot haduh 19 klur 74 lak 54 hajar hapoh ka constituency bad napdeng kine 10 klur duna ngin sa khot tender noh ban shna ïa ka indoor stadium ha Lawsohtun,” ong u Bah Hamlet.
“Ha u Kyllalyngkot 2022 nga la kular ban pynïoh 3 klur ban shna Gallery bad pynbha ïa kane ka madan bad nga sngewkmen ba tang 41 sngi nga la lah ban pynïoh ïa ka mang tyngka bad mynta ngi la ïoh ban plie ïa u mawnongrim,” la ong u Bah Hamlet.
U la ong ruh ba kum u MLA u kwah ban wanrah shibun ki jingmyntoi na bynta ki paidbah jong ka constituency bad trei shitom miet la bad sngi na bynta ka bit ka biang jong ka constituency.
Na ka liang u Bah Banteidor Lyngdoh u la ai ka jingïaroh ïa u Bah Hamletsong Dohling da kaba ong ba udei u briew uba tei shitom ban wanrah ïa ka roi ka par hala ka jong ka constituency. U la ïathuh ruh ba ïalade udei u nongïalehkai football bad u la ïalehkai teng ha kane ka madan bad ong ba kane ka madan kadei kawei na kiba bha bad biang tam hapoh ka jylla bad kadei hok ban ïoh ïa ka gallery.
U la ong ruh ba ka sorkar lyngba ka tnad ïalehkai kan sa pynlong biang ïa ka Meghalaya State League bad kane ka madan kan dei kawei kaban sa ïoh ban pynlong ïa katei ka lympung bah.
U CE u la ong ba ïa kane ka kam yn sa sdang noh bad ka jingkhot tender kan kut ha ka 11 tarik Jymmang.