Tang 100 tyngka shibnai, Ai sngewbhaka Sorkar jylla ïa ki nongshet ja sngi ha ki skul

Jowai, Nailar 25: Ki nongshet ja sngi ‘PM Poshan (MDM)’ ïa ki khynnah skul hapoh ka lama jong ka All Jaiñtia Mid Day Meal Worker Union, Jowai mynta ka sngi kila pynsngew namar ka jingbymshim khia ka sorkar ïa ki mat jingdawa kiba la neh la kumba 20 snem mynta, da kawei ka sur kila rai ban pynlong da ka jingïakhih kaba tyngeh ha ka 29 tarik mynta u bnai (Monday) ha nongbah Shillong.
La ïathuh ruh ba kane ka dei ka sien kaba khadduh ban pynlong ïa ka jingïakhih na ka bynta ka jingdonkam jong ki nongshet ja sngi ha ki skul hapoh ka jylla, kumta kane ka kynhuh ka khot bad wer lang ïa baroh ki nongshet ja sngi ‘PM Poshan’ ba kin wan ban ïasnohkti lang ha katei ka sngi ban dawa ïala ka hok.
Kumba long mynta ka sorkar ka kmie ka la siew pisa haduh 90 percent, katba ka sorkar jylla ka long tang 10 percent 100 tyngka lada kheiñ lang ka long tang 1000 tyngka ha ka shibnai, halor kane ka AJMDMWU ka dawa jur na ka sorkar jylla lyngba u Myntri Rangbah ba kan ïarap katba lah ban pynkiew noh ïa kane ka share.
Na ka liang jong kitei ki nongshet ja sngi ‘PM Poshan’ kila pynpaw ïa ki jingeh kaba khraw ban pyndap pynbiang ïa ki khun ki kti, naduh ka bai skul, bai uniphom, ka bai kot bai kopi bad kiwei de ki jingdonkam jong ki khun jong ki.
Hynrei lada kheiñ ïa ka bai nong kum ka jingsiew ba ai sngewbha ‘Honorarium’ ka long tang T.1000/- shi bnai kaba shongdor tang 30 shi sngi bad ka jingsiew ka long tang 10 bnai haka shisnem ïa kane ruh kila dawa ban dei ban siew beit haduh 12 bnai ha ka shisnem namar ha u bnai December ka don shibun ki jingdawa ban pynkhreh ïa ka Christmas.
Na ka liang u President ka ‘All Jaiñtia Mid Day Meal Workers Union (AJMDMWU) ma Jerry Suting uba ong ba ka seng kala dep ban pynkynmaw ïa ka sorkar haduh hynriew (6) tylli ki shithi hynrei kim shem la urlong, kumta u khot ïa baroh ki nongshet ja sngi ba kin pynlong beit da ka jingïakhih ha Shillong khnang ban urlong ka jingdawa.
Ha ka juh ka por kila dep ruh ban dawa na ka sorkar ba ka dei ban buh noh da ki tyndong shet jingshet LPG ha ki kamra shet hapoh ka PM Poshan, ban lait na ka jingpyndonkam da ki dieng (dpei) kaba ktah ïa ka koit ka khiah bad ka mariang kumjuh.