Tang 10 minit kren u Lat, sdang da ka ktien Khasi bad Garo

Shillong, Rymphang 16: U Lat ka jylla, u Phagu Chauhan, u la thaw history ha ka sngi ba sdang ka dorbar mangtyngka ha kaba u la kren ia ka jingkren lamphrang jong u tang kumba shiphew minit.
Nangta kaba ar kaba la thaw history mynta ka sngi ha Meghalaya Legislative Assembly, kadei ka jingpynkylla sha ka phareng ym tang ha ka jingthoh, hynrei ha ka jingkren ruh, ha kaba katba u Lat u dang kren ha ka ktien Hindi, ki dkhot jong ka ïingdorbar pat ki la ioh sngew ha ki earphone jong ki ha ka ktien phareng ba la pynkylla na Control Room.
Kaba lai pat ka long ba ua Lat u la sdang ïa kane ka jingkren lamphrang jong u da ka ktien Khasi da kaba u ong “ Nga ai khublei ia phi baroh kiba don ha kane ka por ” bad u la kren ruh khyndiat da ka ktien Garo, lehse kaba long ka jingleh kaba ym ju kham jia ha ka ïingdorbar thawaiñ jong ka jylla.
Ha kane ka jingkren u Lat, la kynthup ïa kiba bun ki mat treikam jong ka sorkar ha une u snem 2023 bad kumjuh ruh ki mat treikam kiba ka sorkar kan dang trei nangne shakhmat.
U lat u la pynpaw ba ka jylla ka don hapdeng ka jingshongsuk shongsaiñ ha kaba la lah ban pynlong ïa kiba bun ki tamasa bapher bapher. U la pyni nuksa ïa ka jingïaid beit ka shongsuk shongsaiñ ha jylla da ka jingwan jngoh ka President jong ka ri India ïa ka jylla ha kine ki bnai baladep. U la ïai ban ruh ba ka sorkar ka dang plie ïa ka jingkhang ban ïakren ïasuk bad ka HNLC.
Shuh shuh ka jingkren jong u Lat ka kdew ruh ïa ka jingtreikam jong ka sorkar ha liang ka rep ka riang, ka jingïarap ïa ki nongrep, ka jingshna ïa ki surok, ka jingtei na ka bynta ka New Shillong Township bad kiwei kiwei de ki jingtreikam ban wanrah ïa ka roi ka par ha ka jylla.