Shillong, Jylliew 12 : Ka United Democratic Party (UDP) hadien ba ka la ïoh ban khring ïa u MDC ka NPP na Laban Mawprem, Bah Mitchel Wankhar mynta ka la pynkhreh pat ban pdiang burom ïa u MLA barim ka Mawkynrew, Bah Remington Pyngrope uba dei ruh uwei na ki nongïalam ka NPP ha ka distrik.
Ki khubor ba la ïohlum ki ïathuh ba ïa utei u rangbah yn pdiang burom mynta ka sngi Nyngkong, ka 13tarik u Jylliew ha ka jingïalang kaba heh bha kaban donlang bun bha ki heh ka UDP. Ha kane ka sngi ka party ka la pynkhreh ruh ban pynbna syndon ïa u ban long u kyrtong jong ka party na ka bynta ka elekshon MLA kaban long ha u 2023.
Lah ban kdew hangne, ba u Bah Remington u la jop haduh arsien kum u MLA na katei ka thaiñ hynrei ha u 2018 pat na kiba bun ki daw kiba mih ha katei ka por u la leit ban pynïasoh noh sha ka NPP bad ïakhun na katei ka party.
Kumban shu kdew hangne, ïa ka Mawkynrew constituency mynta la mihkhmat da u Bah Banteidor Lyngdoh uba bat ruh mynta kum u Myntri ka tnad ka Rep ka Riang jong ka sorkar jylla.
Tad haduh mynta, dei sa tang ka NPP kaba dang sngap jar jar halor u kyrtong ban aireng na katei ka constituency.
