Tam met ïap ba la pyut na ka wah ha shnong Umbar kaba don ha South West Khasi Hills District

Mawkyrwat, Jymmang 27: U Superintendent of Police jong ka South West Khasi Hills District Mawkyrwat u la pyntip paidbah ba katkum ka jingtip ba u ïoh na ki nongshong shnong jong ka shnong Umbar, South West Khasi Hills District ba ha ka 24 tarik u Jymmang, 2022 ba la lap ïa kawei ka met ïap jong u shynrang briew kaba pyut na ka wah kaba don ha katei ka shnong.
Ha ka tyllong khubor na u Superintendent of Police jong ka South West Khasi Hills District, bah B.J. Laloo, MPS u la ong ba une u briew uba ïap u phong ïa ka patlun jeans kaba blue bad ka T-shirt rong ïong bad u la don ha ki rta kumba 30 – 35 snem.
Ïa kane ka met ïap kaba la pyut la rah noh sha Ranikor CHC kaba hap hapoh ka Ranikor C&RD Block ban leh ïa kaba donkam bad ïa kane ka met ïap la buh ha ka jaka buh met ïap jong katei ka jaka sumar khnang ba kiba ha ïing kin ïoh ban wan kam.