Shillong, Jymmang, 28: Ki Pulit jong ka Pasteur Beat House ha ka sngi Saitjain ki la leit ban shimti noh ïa kawei ka met ïap shynrang ba la lap na lawbniap kaba don mar pyrshah bad ka Hotel Polo Towers, Shillong.
Katkum ka khubor ba la ïoh lum na ki Pulit, la ïathuh ba kane ka metïap ka dei ka jong u Bah Gilbert Pyngrope, uba shong basah ha Mawpat Circle-3. Une u rangbah u dei u nongniah taksi kamai uba dang shu sdang ban niah biang ïa ka kali kamai dang kumba shi taiew eiei hadien hynriew bnai ba u la mih noh na ka jaka kaba u la shah sumar.
La ïathuh ruh ba ha ka miet sngi Thohdieng ki bahaing hasem ki la pyrshang ban wad ïa u kylleng kylleng hadien ba um shym la wan phai satia sha la ing. La ïathuh, ba ïa ka kali local taxi kaba u niah la lap ba u la pynieng ha lad surok ban leit sha Ganesh Das Hospital kaba don ha Lawmali, Shillong.
Ki Pulit ki la ïathuh ba ïa ka met jong une u rangbah la lap mynta ka mynstep da ki katto katne ki briew bad hadien ba la tohkit bniah ym shym la lap satia ïa ka daw ba une u rangbah un khladnoh na ka jingshah leh dusmon ha kino kino ki riewsniew.
Hadien kane, ki Pulit ki la pynkit noh ïa kane ka met sha Shillong Civil Hospital na ka bynta ban leh ïa kaba donkam katkum ki kyndon jong ka aiñ.
