Shillong, Naitung 27: Ka Hymmiewtrep Youth Council (HYC) ha ka sngi Balang ka la pynpaw ïa ka jingsngew kyndit ba ka jubab kaba u Myntri ka tnad Bording u ai ha Ïing Dorbar Thaw Aiñ ka jylla ka long mar khongpong bad kaei kaba ka seng ka ïoh na ka jingwad jingtip lyngba ka RTI ha kaba ïadei bad ka dor jong u Smart Meter.
Haba kren bad ki lad pathai khubor u Bah Roykupar Synrem u General Secretary jong ka HYC u la ïathuh ba kat kum ka Proceeding jong ka Ïing Dorbar ha ka 11 tarik Lber 2021, u myntri ka tnad bording u James Sangma u la ïathuh ha ka Ïing Dorbar ba ka dor jong uwei u Smart Meter ka long 3,400 bad ha ka 17 taik Lber 2022 u Symbud Myntri Rangbah ba peit ruh ïa ka tnad Bording u la ïathuh sha ki dkhot ka Ïing Dorbar ba ka dor jong uwei u Smart Meter Single Phase ka long 3,750 tyngka bad u Three Phase pat 5120 tyngka khlem da kyntup lang ïa ka khajna GST.
na bynta ban pyndait ïa ki 1,80,000 tylli ha ka jylla.
“Dei ynda ngi ïohi ïa ka jubab kine ki myntri ka tnad Bording ba ngi sa pan jingtip na ka lynngba ka RTI na ophis jong ka Meghalaya Power Distribution Corporation Limited (MPDCL) ha u bnai Jymmang ban ïoh jingshai kaba thikna halor kane ka Projek Smart Meter” ong u Bah Roykupar.
U Bah Roykupar u la ïathuh ba kat kum ka jubab kaba ki ïoh, la ïathuh ba ka Board of Directors Meeting jong ka MPDCL kaba la long ha ka 12 taik Rympang 2021 ki la pdiang ïa ka dor ba la tyrwa da ka JV of Satnam Global ban pyndait ïa kine ki smart Meter ha ka jinglut kaba kot kumba 1,95,34,84,189 (khlem kyntup ïa ka khajna) ka kot kumba 2,32,96,39,344 tyngka lada kyntup bad ka khajna bad kiwei ki jinglut haduh haduh ban da dep pura ban pyndait kaba ka dor uwei u Smart Meter ka poi kumba 9,444 tyngka.
Shuh shuh u la ïathuh ba ïa ka Letter of Award sha kane ka kompeni la ai da kane ka tnad ha ka 16 tarik Rymphang 2021 kaba ka dor jong uwei u Smart Metre ka long kumba 9526 tyngka uwei u Smart Meter, ka bai pyndait pat ka poi 1715 tyngka bad ka GST ka poi 259 kaba long mar khongpong bad kaei kaba ki Myntri ki la ai jingtip ha khmat ki dkhot ka Ïing Dorbar.
Shuh shuh u la ïathuh ba kat kum ki kyndon kiba ha ka Contract la ong ba ka dor ka bai pyndait ka dei tang 300 tyngka uwei u Smart Meter.
U Bah Roykupar u la ïathuh ba ka jubab kaba ki ïoh lyngba ka RTI la ong ba ka dor jong ka Contract kaba la ai sha kane ka kompeni ka long kumba 2,32,96,39,344 ha kaba lada khein ka dor jong uwei u Smar Meter ka poi kumba 12,941 tyngka haduh ban da dep pura ban pyndait. U Bah Roykupar u la ïathuh ruh ba lada shim na ka dor kaba u Myntri u ïathuh ha ka Ïing Dorbar ba ka dor uwei u Smart Meter ka long 3,750 kaba mut ka bai pyndait pat ka long kumba 9191 tyngka kaba ka dor ka tam ar shah wat ïa ka dor jong uwei u Smar Metre.
Ka HYC ka la buh jingkylli ruh ba kumno u Myntri u la ai jingkhein ïa ka jinglut kawei ka projek khlem da kyntup ïa ka dor ka GST, ka bai pyndait
“Dei namar ngi kwah ba u paidbah un shai ngi dawa ba u Symbud Myntri Rangbah u dei ban pynshai ba kumno ka ka dor ban pyndait ïa ki 1,80,000 tylli ka poi haduh kumba 232 klur tyngka namar ka dor kaba ki pyntip ha ka Ïing Dorbar uwei u Smart Meter ka long tang 3,750” ong u Bah Roykupar.
