Nongpoh, Risaw, 24: Kum kawei na ka thong ban dang pynduna ïa ki aksiden kali bad ki jingjia ba sngwsih ba la ju jia ha ka surokbah National Highway-6 ha Ri Bhoi tang na ka daw ka jingdon ki Kali ba pynkheiñ aiñ, Ki pulit ka Ri Bhoi mynta ka sngi ki la khywit ban talasi ne khynra sa ïa ki Kali ba pynkheiñ aiñ na Byrnihat sha Jorobat, kaba dei ruh hadien ba ka tnad Pulit na Ri Bhoi ka la ïoh ka jingujor na bun ki paidbah bad ki heh sorkar jong ka jylla Meghalaya.
Ha kane ka jingkhynra Kali na Byrnihat sha Jorobat la ïalam hi da u Senior Superintendent of Police ka Ri Bhoi u V.S Rathore ryngkat ka jingdon lang ki heh pulit ophisar bad kwei kiwei ki Pulit na Ri Bhoi, kiba la bteng ban pyrkhinng bad tehlakam ïa baroh ki jaid kali ba pynkhein aiñ.
Ki kali kiba la shah bat bad shah daiñ kuna ki kynthup naduh ki nongñiah kali ba dih buaid, kiba pynher sted ïa ki Kali, kiba pynieng khlem akor ïa ka kali ha surokbah, ki bym deng Helmet bad Seat belt bad kiba ym don kot don sla bad kane ka jingkhynra ka sdang naduh ka por 3 baje janmiet ha kaba bun ki Kali naduh na Byrnihat shaduh sha Jorobat ki la shah daiñ kuna hadien ba la lap ba ki la pynkheiñ ïa ki kyndon aiñ ñiah Kali.
Haba kren sha ki lad pathai khubor, u SSP ka Ri Bhoi u VS Rathore , u la ong ba kane ka jingsdang ban khynra ïa ki Kali na Byrnihat shaduh sha Jorobat, ka dei hadien ba bun ki paidbah ki la ujor bad kynthup ruh naduh ki heh sorkar bad ki nongmihkhmat ba ka jingpynieng khlem akor ïa ki Kali ka la wan rah ka jngdheng kali bad ki jngjia ba sngewsih ha katei ka surokbah.
U la ong ruh kum ka tnad Pulit ka sngewthuh ïa ka jingshah ktah lada ki nongñiah kali ki shah daiñ kuna ha ba ki la pynkheiñ aiñ bad na ka liang ka tnad Pulit kan nym map bad ka aiñ kan nym map ïano ïano, namar ka jingim briew ka kham kordor ban ïa ka jingshah ktah kito kiba shah daiñ kuna.
U la ther tyngeh ruh naduh mynta la khang ïa baroh ki kali khamtam ki Trok ban ieng na Byrnihat sha Jorobat ba kane ka la pynthud ïa ki Kali paidbah ba ïaid ba ieng bad ka buh jingma ruh ïa ki paidbah bad lada dang don ki Kali ba ïaleh pyrshah kin shah daiñ kuna beit katkum ki kyndon jong ka aiñ,
U la maham ruh ïa ki trai Dhaba ne Hotel ba kim dei ban shah ieng khlem akor ïa ki Kali harud surok bad lada lap nangne shakhmat kin daiñ kuna ym tang ïa ki Kali ba ieng khlem akor bad lyngba ka Magisterial Power kin khang ruh wat ïa ki Dhaba ne ki Hotel, u la ong.
“Kane ka jingshim khia ban pyrkhing ïa ki Kali ba pynkhein aiñ, ka dei ka jingsngewkhia halor shibun ki jingjia ba sngewsih ba la jia ha kane ka surokbah bad naduh ba la pyrkhing la duna ki jingïatyngkhuh kali ne ki jngjia ba sngewsih bad ban lait na ki jingjia ba sngewsih ki Dribar ki dei ban bud rynth ïa ki kyndon khnang ba lait na ki jingjia ba sngewsih ne ka jingshah daiñ kuna” ong u VS Rathor kum u heh Pulit ka Ri Bhoi.
U la khot la wer ruh ïa ki paidbah ban ai ka jingïatrei lang na ka bynta ban pynduhna ïa kino kino ki jingjia ba sngewsih ha kane ka surokbah bad khamtam ban ïa khun pyrshah ruh ïa ki kam sniew bad na ka liang ka tnad Pulit na Ri Bhoi kan nym shongthaid bad kan bteng ïa ka jingtehpyrkhing ha kaba kito kiba pynkheiñ aiñ kin nym lait na ka kuna ne ha ki kyndon jong ka aiñ, u la bynrap.
