Shillong, Nohprah, 21: U Symbud Myntri Rangbah ka Jylla uba khmih ïa ka tnat Pynroi Sor u Bah Sniawbhalang Dhar u la takraiñ tyngeh ïa ka Kutumba Surakshya Parishad (KSP), ka kynhun jong ka niam Hindu kaba la dawa ba dei ban plie biang ïa ka krem Mawjymbuiñ khlem da tip ïa ka rukom bat khyndew hapoh ka jylla Meghalaya.
Ha ka jingïakren bad ki lad pathai khubor, u Bah Dhar u la ong ba kane ka kynhun jong ka niam Hindu kam lah ban shu aipor khatduh ïa ka sorkar.
“Ki dei kiei kita? u la kylli.
“Ki (KSP) dei ban tip shwa nyngkong eh ïa ka rukom bat khyndew hapoh ka jylla. Bun na ki jaka hangne ki dei ki nongkynti shimet. Ka (krem Mawjymbuin ruh) ka don ha ka jaka shimet namarkata katba ki rai (ki trai jaka) ka shong ha ka mon jong ki,” ong shuh shuh u Bah Dhar.
Ka Kutumba Surakshya Parishad (KSP) ka la aipor khatduh 10 sngi ïa ka Sorkar Meghalaya ban dawa ba dei ban plie biang ïa ka krem Mawjymbuin na ka bynta ban ïoh pynlong ïa ka jinglehniam jong ki riewngeit ka niam Hindu. Kane ka kynhun ka la byrngem ruh ban khangdam ïa ki surok ba kongsan kiba pynïasoh ïa ka Meghalaya, ba kynthup ïa ka surook na Jorabad hajan Guwahati, lada ka jingdawa jong ki kam urlong shwa ka Christmas.
