Takraiñ tyngeh u Spokeperson bad President MCTODA bym bud ki company dewbilat ïa ki kyndon Wages Act

Khliehriat Naiwieng 03 : Ki ar ngut ki nongialam jong ka Meghalaya Commercial Trick Owners and Drivers Association (MCTODA) ba kynthup u Spoke Person, u bah Wanshwa Nongtdu bad u President u bah Moslandar Marngar ki la takraiñ tyngeh ïa ka jingleh ki karkhana pynmih dewbilat kiba na East Jaiñtia Hills District namar ka jingbym bud ïa ki kyndon jong ka Wages Act haba ki ai jingsiew sha ki nongtrei kiba trei hapoh ki company, kumjuh ruh ki la kynthoh jur ïa ka jingbym biang ka rukom thungkam ïa ki trai jylla hapoh ki company.
Haba kren ha ka jingialang ba la pynlong mynta ka sngi ha ophis u Deputy Commissioner ha Khliehriat u bah Wanshwa Nongtdu u la ong
“U treasurer jong ki karkhana dewbilat u la ïalam bakla namar u la ong ba ki company ki la thaw shibun bha ki lad iohkam ïa ki briew hynrei ka jingkylli ka mih bad tharai lada leit jurip phin lap ruh ba ki briew trai muluk ki kut tang ha ka kam sar ïing, pynkhuid ïing kiba dei ki kam kiba rit ba ria bad ruh ha kaba iadei bad ki kyndon jong ka Wages Act, lada leit tohkit ïa ki company dewbilat yn lap ba ym don uwei ruh u briew jong ngi uba ioh jingsniew katkum ka Wages Act, uba ioh 100 hajar kata uba la trei slem bad ïa u dkhar pat lada ki ïa sdang trei ha ka juh ka por tang hadien lai bnai u la ioh ïa ka jingsiew kaba katkum ka Aages Act, shuh shuh haduh mynta ym pat don uwei ruh u Residentia Director, uba dei u na Khasi, Jaintia, na Garo ha ki company dewbilat, balei tang ki dkhar? balei ki briew jong ngi kim long qualified mo, kane ka dei kaba sngewsih ba na ka por sha ka por tang uba na bar beit, ka jingkylli ka mih ruh ba balei ïa u dkhar u bym nang tang u A, u B u ioh ban long CEO? Bad ïa ki khun ka bri hynnñewtrep pat kiba la pyndep ïa ki kyrdan pule ba heh ki ioh tang ban ap gate bad sar ïing, hooid ki ai kam ïa ki briew hynñiewtrep hynrei la shu ai kam tang ban shu im kyndoi-padoi malu mala”.
U bah Wanshwa u la ong ruh ba “ki karkhana ki don beit ka jingionnong bad ki la tip ïa ka jingiohnong, namar ba ki company ha ka por ba wan nyngkong shane kum ka Star Cement, ka Topcem, ka Dalmia wat ïa ki jaka ruh ki ioh ha ka dor ba rit namar ïa ka jaka shane la shu ïa dei kumba die um bilor na kata ka daw ki company ki don beit ka jingiohnong”
Kumjuh ruh na ka liang u bah Moslandar Marngar u la ong “ Ka jingdawa jong ngi ka long ba dei ban ai ïa ka Proper Employment Contract Labour Compliances ka mut na ka bynta haba pynrungkam driver namar ki don ki driver kiba dei ki dkhot jong ka MCTODA ki ñiah ïa ki kali jong ki company bad kiba dei ruh kum ki Helper ne nongbud kali, ki la dep thoh sha ki company ba kin sngewbha ban pyntreikam katkum ka Labour Act, hynrei ki briew jong ki company pat ki ong hakhmat u DC bad hakhmat jong ngi ruh ki ong pynban ba na ka liang jong ki kim don kali, haba ngi kylli biang ba kumno kim don kali haba ki nongñiah kali kiba dei ki dkhot ka Association ki la ong ba ki ñiah ïa ki kali company dewbilat, te ynda la iakren kin sa ong bad iathuh ba ki don tang katto katne ki kali company dewbilat, kane ka paw ba na ka liang ka jong ki company ki mut ban buhrieh beit ïa ka jingshisha”
Kitei ki nongialam ka MCTODA ki la ong ba ha kane ka jingialang mynta ka sngi kam shym don kano kano ka jingsei soh ruh ha kaba iadei bad kiwei kiwei ruh ki mat dawa ba kynthup ka jingdawa ha kaba iadei bad ka jingsiew bai kit ia ki kali ba kit dewbilat bad kit clincker bad la sngewthuh ba ka jingpakhang ïa ki kali ba kit dewbilat bad ba kit clinker kan nang ïai bteng.