Shillong, Nailur, 22: Ka All India Trinamool Congress, Meghalaya ka la takraiñ tyngeh ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP) halor ka jinghiar ar sut ki jaka ai jingsunar ha ka jylla.
Ka AITC, Meghalaya ka la thad paidbah ha ka Twitter jong ka ïa ka jingbym phaikhmat jong ka Sorkar MDA halor ka jinghiar arsut ki jaka ai jingsumar.
“Ki jaka kha khunlun h aka jylla ki duna bha haduh 51.4 %. Naduh u Ïaiong, 2020- Naitung, 2020, haduh 877 ngut ki khunlung ba dang shu kha bad 61 ngut ki longkmie ba armet ki khladnoh na ka daw ka jingbym biang ki jaka ai jingsumar. Katkum ka kaiphod na ka tnat ka Koit ka Khiah, Meghalaya, bun na ki longkmie ba armet ki khladnoh namarba ym shym la pynkit sha Hospital lane na ka daw ka jingbym don ki jaka sumar ban pynkha khun,” la kynnoh ka AITC, Meghalaya.
Ka AITC ka la ong, katkum ka jingai jingkheiñ da ka National Familly Health Survey Report, ka Sorkar India na ka bynta u snem 2019-20 la shem ba 54% na ki kynthei ha Meghalaya ki don ïa ka jingpang duna snam, kynthup ïa 24% kiba duna snam malu mala, 28% kiba kham hiar ka jingduna snam bad 2% kiba duna snam shaba palat. Ka jingpang duna snam ka kham jur ha ki kynthei ha ki shnong nongkyndong, khamtam ha ki kynthei kiba hapdeng ka rta 40 haduh 49 snem bad ki kynthei ki bym dei na ka Scheduled Caste, Scheduled Tribe lane na ki Other Backward Classes, hynrei ka jingpang duna snam ka kynrei hapdeng 45-62% ïa baroh ki kynthei.
“Ka jingïap jong ki khunlung ba dang shu kha (Infant Mortality Rate) ha Meghalaya ka long 34 ngut kiba ïap na ki 1000 ngut ki khunlung ba dang shu kha haba ïanujor bad ka jingïap jong ki khunlung ha ka pyrthei baroh kaba long 29 ngut; ka jingïap jong ki longkmie ba armet (Maternal Mortality Rate) ka kham jur ha Meghalaya kata haduh 197 ngut kiba ïap na ki 1,00,000 ngut kiba kha khun,” la kynnoh ka AITC.
Dang shen u MLA ka AITC u Bah George B. Lyngdoh u la rah ïa kane ka mat ha ka Dorbar Synrai jong ka Iingdorbar Thawaiñ halor ka jingïap jong ki khunlung ba dang shu kha ha ka jylla kaba kiew da 20.6 na ki 1000 ngut ki khunlung ba dang shu kha ha ki shnong nongkyndong, bad ong ba kane ka dei ka kam kaba khia bha.
Ha Meghalaya, haba kheiñ kyllum ka jingïap jong ki khunlung ba dang shu kha ka long 29 ngut na ki 1000 ngut ki khunlung ba dang shu kha haba ïa nujor bad kiwei pat ki jylla kiba rit.
Ka Meghalaya ka mad ïa ka jingkyrduh ki Doktor ba tbit haduh 65% bad ki nongshong shnong ki ïai mad ïa ka jingsuhsat na ka daw ka jingbym ïoh ïa ki lad jingsumar kiba biang.
Ka jingduna jong ki 109 ngut ki doktor ba la tbit na ki 112 tylli ki Community Health Centres (CHC) ba don ha ki nongkyndong ba kynthup ïa ka Bajengdoba CHC ha North Garo Hills, ka dei sa kawei pat ka jingeh kaba ki nongkyndong ha ka jylla ki mad.
Ka AITC ka la ong ruh ba ka Meghalaya ka la shah ñiew kum kawei na ki jylla kaba bun ki nongpang bampong ha ka ri, ha kaba uwei ha manla ki san ngut ki shynrang bad kawei na manla ki 9 ngut ki kynthei ki dei kiba shah ktah ha kane ka jingpang.
“Hynrei ka Sorkar Jylla kam shym la phaikhmat ïa kane ka jingeh jong ki paidbah nongshong shnong,” la kynnoh ka AITC.
