Nongstoiñ, Nailar 20: La kumba katto katne snem mynta ka shongsuk shong saiñ ka la wan phai biang ha ka thaiñ Langpih, hynrei ki paitbah pat ki lynga bad pisa jingmut haduh katta katta namar ka jingbym pat pynbeit ïa u pud u sam bad ka jylla Assam.
U bah H.Sangleiñ uwei na ki riew rangbah jong ka shnong Langpih, haba ïakren bad u nongthoh khubor, u la ong ba ha ki snem ba mynshuwa lada ki paitbah nongshong shnong ki pom dieng ban shna ïing shna sem, ki pulit Assam kiba don ha Langpih tang shu tip ki la wan pyndik lai phew jait.
U la ong ba lada don kino kino ki nongshong shnong kiba pyntrei ïa ki skhim ba ki ïoh na Meghalaya ruh, ki ju wan pyndik hynrei ha kine ki sngi pat kim ju wan pyndik ne mushlia shuh.
Nalor kata u la ong ba lada ki nongshong shnong ki leit ban pom dieng sha phang mihngi sha shilliang ka surok ba la shna da ka sorkar Assam, ki hap ban leit siew shuwa da ka pisa sha ki pulit Assam ha Langpih, lymda kumta kim ïoh lad ban pyndonkam.
Utei u rangbah u la ong ruh ba naduh ba la dep siang rong ïa ka surok na Ktiehthawïar sha Langpih bad ka ktem pulit jong ka Meghalaya ka la don ha Langpih, ki jingïaklumar ki la kynjah jar bad ka jingwan thied jaka jong ki briew na sha kiwei pat ki shnong na ka bynta ban rep ban riang ka la jur bha.
Ki la ong ruh ba katba ym pat pynbeit ïa u pud u sam ba thikna bad ka jylla Assam, ki paitbah kim pat sngew thikna la kin shah kynthup ha Meghalaya ne kin shah khynñiat sha Assam. Lada jia kino kino ki jingeh ka jingbun jong ki paitbah, kan kham pynshngaiñ ïa ki nongshong shnong wat lada ka long kumno kumno ruh.
