T. 95 klur pynlait ka sorkar pdeng ka bai thied jaka na ka bynta ka Shillong-Dawki road project

Shillong, Nohprah 09: Ka sorkar pdeng ka la pynlait ïa ka song pisa bailutksan ban thied jaka kaba long T. 95 klur na ka bynta ban pyntreikam ïa ka Package III, jong ka Pynursla Bypass ka Shillong-Dawki road project.
Ïa kane la pyntip da u Symbud Myntri Rangbah ka jylla u ba khmih ïa ka tnat PWD (roads) u Bah Prestone Tynsong hadien ba la pynlong ïa ka jingïalang bishar kam ba la ïashim bynta da ki ophisar na ka National Highways and Infrastructure Development Corporation Limited (NHIDCL) ha ka sngi baar.
U Bah Tynsong u la pynbna ba ka pisa bailutksan na ka bynta ka Package III, ka Pynursla Bypass, lah dep ban mang da ka sorkar pdeng, da malu mala T. 95 klur kaba la mang na ka bynta ka bai jaka.
“Shen ka district collector ka East Khasi Hills bad kumjuh u SDO Civil Pynursla kin sa peit ïa ki jnit ki jnat jong ka bai jaka ki trai jaka bad kin sa pynlait ïa ka pisa sha ki bank account jong ki baroh,” u la ïathuh sha ki lad pathai khubor.
Haba pynpaw ïa ka jingsngewhun bad ka jingïaid jong kiwei pat ki song pisa ne package jong ka Shillong-Dawki Road project, u Bah Tynsong u la ong, “Nga kmen ban pyntip shaphi ba ka song pisa jong kaba I, II, IV, V, ka jingïaid jong ki kam ka la long kaba sngewhun.”
Ha kaba ïadei bad ka song ne Package I, u Bah Tynsong u la pynbna ba ka NHIDCL bad ka kompeni kaba shna ne tei ka thmu ban pyndep ïa ka 4-lane stretch shaduh Baniun Pomlum ha ka 31 tarik u Nohprah, 2025.
“Ngin long kiba lah ban pyndep ïa ka, haoid ki lah ban don ki kam kiba rit ba ria hynrei ka kam jong kane ka 4-lane kan long kaba treikam noh ha shwa ban kut une u bnai bad ha shwa ban kut jong une u snem,” u la ong.
U Symbud Myntri Rangbah u la pynpaw ruh ba ka jingïaid jong ka kam haba ïadei bad ka Package II, IV, bad ka V ka la long kaba sngewhun, ha kaba la shim ki sienjam ban ïa pynbeit ïa ki kam kiba ktah ïa ka sawdong sawkun.
“Ka la don ka jingbthah sha ka company kaba dei peit ban pynthikna ba ki kyndon ba la ai da ka Meghalaya State Pollution Control Board dei ban pyntreikam pura,” u la bynrap.
Haba ïadei bad ka Shillong-Western Bypass, u Bah Tynsong u la ong ba ka kam ka la ïaid shaphrang bha bad da kaba buh ka thong ban pyndep ha u snem 2026.
“Ka jingïaid jong ka kam ka long kaba bha, watla ka long ka jingïar kaba rit jong ka package III, ngi don khyndiat ki jingïakhun ha kaba ki trai jaka, ka shnong, ki jingïakam markylliang ki dang don. Nga pynthikna ba hapoh katto katne taïew naduh mynta, ka district collector kan sa lah ban pynbeit ïa kane ka kam,” u la bynrap.