Nongstoiñ, Nailur 27: Ha kane ka sngi thohdieng ka 26 tarik Nailur ka dei ka sngi sah jingkynmaw ïa ka kur Lyngdoh Nonglait, namar ba katei ka sngi ba ka Kur Lyngdoh Nonglait ka la rakhe kyrpang ïa ka lyngkhuh snem ba shiphew jong ka jingkhlad noh jong u (L) Maieit Hopingstone Lyngdoh, u ba dei u Basan jong ka kur Lyngdoh Nonglait, na ka bah Shakliar Warjri MLA ka Mawthadraishan, u la pynbna ba un ai jingïarap kumba phra phew hynñiew lak tyngka sha ka kur ba kan pynbiang ïa ka madan ïalehkai jong ka kur.
Kane ka dei kaba u la pynbna kum ka jingnoh synñiang jong u sha ka kur, ha ka por ba u long kum u kongsan ha katei ka sngi, ha kaba ka kur Lyndoh Nonglait ka la pynlong ïa katei ka jingrakhe ha phyllaw jong ka Mawkyllei College kaba la seng da u (L) Maieit Hoping, ha kaba la ïa don ryngkat da baroh ki kur ki jait bad ki khynnah kiba pule ha katei ka skul.
U kongsan u la ïoh ban pynkup burom ruh ïa ki samla pule kiba wan shakhmat ha ki exam da u kongsan bad kiwei kiwei kiba la don ryngkat ha katei ka sngi. Kine ki kynthup naduh kiba wan shakhmat ha ka Secondary School Leaving Certificate, Higher Secondary School Leaving Certificate 2024 -25 ba la pynlong da ka Meghalaya Board Of School Education. Kumjuh ruh ïa ki ba wan sha khmat ha ki post Graduate bad Master degree ha ka jingpule jong ki ha ka skul bah North Eatern Hills University Shillong.
U bah Shakliar Warjri haba kren kum u kongsan ha katei ka sngi, u la kyntu ïa ki samla pule ba ki dei ban pynleit jingmut bad minot thop ha ki jingpule jong ki haduh ba kin da lah ban pyndep. U la kyntu ruh ba ki dei ban pyndonkam hok ïa ka jingstad, da kaba buh ïa ka thong ha ka jingim jong ki kaei kaba ki dei ban leh na ka bynta kiwei pat.
