Shillong, ïaïong, 10: Ka kynhun ïalehkai Marbisu ka la ïoh khur ei ïa ka khusnam da ka song pisa kaba T.40 hajar hadien ba ka la ïohrah ia ka nam lahduh ha ka lympung ïalehkai phutbol phainal ba la pynlong da ka Ladmawreng Social Youth & Sports Organisation (LSYSO) da kaba pynliem noh ïa ka kynhun ïalehkai Umthlong da 2-1 kol.
Ka Umthlong kaba la wan ba ar ha kane ka jingïalehkai ka la ïoh khur ïa ka song pisa kaba T.20 hajar.
Ïa ki khusnam la sam da u Samla George C. Sunn uba la long kum u Kongsan ha kane ka sngi uba la mihkhmat ha ka jaka u Kpa u Bah JA Lyngdoh (u bym shym la lah ban poi na ki daw ki bym lah kiar) uba la long u MLA barim jong ka Mawphlang Constituency ha ki snem kiba la leit noh.
Ha kane ka sngi, la sakhi lang da u Rangbah Shnong ka Marbisu, ki riewrangbah lem bad ki nongïalam ka Organisation bad ki paidbah kiba la wan sakhi ïa kane ka jingïalehkai kaba itynnad.
U Samla George Sunn haba kren kum u Kongsan u la ai ka jingkular ba ma u lem bad u Kpa jong u, kin sa nang ïai buddien ïa ki kam kiba ïadei bad ka jingpynbha ïa ka madan phutbol ha Ladmawreng Umpomtih khnang ba kan ai jingmyntoi ïa ki samla kiba angnud ban pynpaw ïa la ki sap ki phong ha ka rynsan ïalehkai phutbol.
Ha kajuh ka por u la kyntu ïa ki samla kiba ïashim bynta ha kane ka lympung ïalehkai ba kin nang trei minot shuh shuh khnang ba kin dup lah ban pynpaw pyrthei ïa la ka sap kaba ki don naba ka jingïalehkai phutbol ka la long mynta ka pliangja bad kam kamai jakpoh jong ki nongïalehkai kiba la kham paw.
Na ka liang jong u Bah JA Lyngdoh lyngba u khun, u Samla George Sunn u la noh synñiang sha ka LSYSO kum ka dak ka jingai sngewbha ban ïoh pynbha noh ïa ka madan ïalehkai ha Ladmawreng Umpohtih.
