T.25 lakh pynbna u Conrad sha ka skul Little Flower School Mawbri, ban shna ïa ka building skul ba paka

Nongpoh, Risaw 01: Ka skul Little Flower Secondary School, Mawbri kawei naki shlem ai jinghikai kaba la kham paw ha katei ka thaiñ mynta ka sngi hapdeng ka jingiphuh iphieng kala pynkut noh ïaka jingrakhe ïaka jubili ksiar ne ka jingrakhe dap 50 snem jong ka skul naduh bala sdang ïaka ha u snem 1975.
Ha kane ka sngi ka jingpynhap pyrda noh ïaka jingrakhe la sakhi ruh da ka jingdonlang u Conrad K Sangma Myntri Rangbah ka jylla kum u kongsan, u Bah Damanbait Lamare MLA ka Umroi kum u symbud kongsan, haka jingdonlang u Bah Isynei Hinge, MDC Umroi, u Fr. Balestine Marbanniang, Principal, ki ophisar sorkar, ki nonghikai lem bad ki khynnah skul ba mynta bad ba rim jong katei ka skul.
Lah ruh ban kdew hangne ba ka skul Little Flower Secondary School kaba don haka shnong Mawbri, Ri-Bhoi District kadei kawei naki shlem pule kaba la paw haka thaiñ Ri-bhoi Mihngi kaba la pynmih ruh shibun ki samla pule kiba la longbriew man briew bad kiba la pyndep ïaki jingpule haki kyrdan bapher bapher bad kiba la trei ruh haki kam bapher bapher.
Lyngba katei ka sngi naka liang u Myntri Rangbah ka jylla u Conrad K Sangma u la pynbna syndon ban aiti da ka song pisa kaba haduh T.25 lakh sha katei ka skul ba kan ioh ban shna ïaka building ba paka bad kaba bit ba biang naka bynta ka jingmyntoi jong ki khynnah pule.
Haba kren ha kane ka sngi naka liang u Myntri Rangbah ka jylla u la ong ba kam long kaba suk ban kyntiew syndon shalor ïaka pule ka puthi haka jylla, hynrei ka sorkar kala trei shitom kat lah kat ïai ban kyntiew ïaka pule puthi haka jylla bad ha kine ki 10 snem duna ka sorkar kala ïaleh shitom katba lah ban kyntiew ïaka pule ka puthi naduh ki building lem bad ki jingdonkam bapher bapher haki skul.
U la ong ruh ba ha kiwei ki jylla haka thaiñ Shatei Lam Mihngi, ki don ki skul shimet ki bym ju ioh jingïarap naka sorkar, hynrei ka sorkar Meghalaya ka ju ïarap da kaba pynioh da ka ki kynja Grant kiba pher bapher, bad tang hapoh shisnem ka jylla ka pynlut kumba 200 klur ban kyntiew ïaka pule ka puthi bad ki skul shimet.
U la ai ruh ka jingïaroh ïaka Balang Catholic naduh ki misionary, ki father, ki brother, ki sister lem bad kiwei kiwei kiba don bynta ban trei shitom ban ai ka kti kamon ka diang ban kyntiew ïaka pule ka puthi ym tang ha katei ka thaiñ hynrei haka jylla hi baroh kawei.