Mawkyrwat, Jylliew 01: U MLA jong ka Mawkyrwat Constituency Bah Renikton Lyngdoh Tongkhar ha ka sngi Saitjaiñ jong ka taïew ba ladep u la pyllait paidbah ïa ki skhim bad kumjuh ruh ki projek bapher bapher kiba kot T. 2.50 klur ha Mawkyrwat Constituency lyngba ka Special Rural Works Programme (SRWP) jong u snem 2024-25.
Ïa ka jingïalang la pynlong ha ophis treikam jong ka UDP ha Mawkyrwat, South West Khasi Hills District.
Ïa ka skhim la pyllait ha kaba shit ba shai khlem kano kano ka jingbuhrieh sha ki nongïoh jingmyntoi, ha kaba u MLA u la buh kyrteng ïa baroh ki jait skhim bad kumjuh ruh ïa ki kyrteng jong ki nongïoh jingmyntoi na ka bynta ki skhim paidbah.
Ki skhim ki kynthup ïa ka jingshna ïa ki Multipurpose Hall, ki kamra klas jong ki skul, ki madan ïalehkai, ki lynti ïaid kjat, ki pung um dih, ki paiñkhana na ka bynta ki skul, ka check dam, ki surok, ka jingker, ki jaka ap bus, ki jaka ieng kali, kawei ka kali kit nongpang, bad kumjuh ruh ki skhim shimet sha palat 1000 ngut ki briew shimet.
Ha kane ka prokram la ïashim bynta ruh da u Block Development Officer (BDO) jong ka Mawkyrwat C&RD Block Bah I. Lawriniang, u President jong ka Mawkyrwat People’s Development Association (MPDA) Bah S.K. Budnah, Bah Phrangkupar Syiemiong, Secretary ka MPDA, u President ka UDP Mawkyrwat Circle Bah Shaiñkor Nongsiej bad kiwei kiwei.
