Shillong, Naitung 28: Kum shi bynta ban kyntiew ïa ka kamai ka kajih ki nongrep diengjri, u Myntri Rangbah ka Jylla Conrad K Sangma ha ka sngi Nyngkong, ula plie ïa ka Centrifuged Latex Manufacturing Unit ne ka karkhana saiñ jri, ba nyngkong eh ka Jylla, ha Koksi Nengsat kaba hab hapoh ka Songsak C & RD Block.
La ong ba kane ka karkhana kaba dei kaba ar hapoh ka thaiñ Shatei Lam Mihngi, ka pyni ïa u mawmer ha ka jingpyrshang jong ka jylla ban kyrshan ïa ki nongrep bad kyntiew ïa ki nongsengkam sengjam lajong.
Ïa kane ka karkhana la pynïaid da ka Sister Rose, ka nongseng jong ka Mendipathar Multipurpose Cooperative Soceity (MMCS) bad bei tyngka haduh T.18.8 klur lyngba ka Meghalaya Basin Management Agency, ka project ka ban ai jingmyntoi ïa kumba 3000 ngut ki nongrep diengjri ha kylleng ka Ri-lum Garo.
Ha kaba ïadei bad kane na ka liang u Myntri Rangbah u la ong, “Ka karkhana kan dei ka jingkyrkhu ïa ka Ri-lum Garo bad ka Jylla baroh kawei, naba kan ai jingmyntoi ïa kiba bun bah ki nongrep kiba don bynta ha ka kam rep diengjri.”
U la ong, “Naduh ba ka Sorkar jong ngi ka la shimti ban synshar ha u 2018, kaba hakhmat eh ka long ban sngewthuh ïa ka jingeh jong ki nongrep jong ngi bad ban ai ïa ki lad jingïarap ki ban kyrshan ïa ki. Ki prokram kum ka Focis, Focus+ bad CM Farm+ ki dei shibynta jong kane ka thong.”
Halor kane u Myntri Rangbah ula kdew ruh ba ki nongrep diengjri ki la shah khñoit la slem bha ha ki nongkhaïi kiba wan nabar jong ka thaiñ. “Kane ka karkhana kan pynkylla noh ïa kane, bad kan tyrwa ïa ka dor ka mur kaba long katkum ka ïew bad kan pyllait ruh ïa ki nongrep na ka jingpynsyrwa ïa ka por,” u la ong haba kyntu ïa ki nongrep diengjri ba kin die ïa ki mar jong ki beit beit sha kane ka karkhana.
Haba pynpaw ïa ka jingkongsan kine ki project ha ka ïoh ka kot, u Myntri Rangbah ula ong, “U Myntri Rangbah Duh ula buh ïa ka thong ban kyntiew arshah ïa ka kamai kajih ki nongrep. Hynrei hangne ha Meghalaya, ngi hap ban pynheh shuh shuh ban ïa ka arshah, haba khmih ïa ka jingshaniah tylli ha ka kam rep. Ban kynjoh ïa ka thong $10 billion ha ka ïoh ka kot, ngi hap ban pynkhlaiñ ïa ka kamai kajih bad ki lad ki lynti ïa ki nongrep”.
U Myntri Rangbah u la pyntip ruh ba 40 tylli kum kine ki karkhana kin sa mih hapoh ka Jylla ban kyntiew ïa ka ïoh ka kot jong ki nongrep bad pynduna ïa ki jingduhnong. “Ki kam Sorkar ki la dap lut. Ngi donkam ban pynshlur ïa ki samla ban shim ïa ka lynti ban sengkam sengjam lajong. Lyngba ka CM Elevate, ngi la kyrshan ïa ki nongsengkam hapoh ka Jylla,” ula ïathuh.
U Conrad ula buh ruh ïa u maw nongrim jong ka Fruit Dehydration Unit ba nyngkong eh ka Jylla. Kane ka project ba T.23 klur, kan sa dep ha u bnai Naiwieng jong u snem ban wan bad kan pynmih haduh 7,400 MT u soh manla u snem, ka ban ai jingmyntoi ïa palat 5000 ngut ki nongrep lyngba ka jingthikna ba kin lah ban die ïa ki mar, ka dor ka mur kaba kham bha bad ka jingai kam aijam.
Ha ki jingïalang la ïadonlang u Myntri ka tnad PHE Marcuise Marak, MLA Marthone Sangma bad ka Sister Rose, Secretary ka MMCS, nalor kiwei kiwei kiba la shah khot sngewbha.
