T. 121 klur mang ka Sorkar Pdeng na ka AMRUT ban tei ka projek sam um ha Williamnagar

Shillong, Nailur, 01: U Myntri Rangbah ka Jylla u Conrad K Sangma bad u Myntri Khynnah ka Sorkar Pdeng uba peit ïa ka Ministry of Housing bad Urban Affairs ha ka sngi Palei ki la buh ïa u mawnongrim ban tei ïa ka Williamnagar Urban Water Supply Project Phase-I ha kaba la sakhi lang da u Myntri ka tnat PHE ka Sorkar Jylla u Bah Renikton Lyngdoh Tongkhar bad ki MLA ba kynthup ïa u Marcuise Marak, u Jim Sangma bad u Abdus Saleh.
Ïa ka Williamnagar Urba n Water Supply Project Phase-I la mang pisa T. 121 klur lyngba ka AMRUT 2.0 ha kaba ka Sorkar Pdeng kan bei pisa 90 persen katba ka Sorkar Jylla kan bei pisa 10 persen. Ïa kane ka skhim sam um la pynrung hapoh ka AMRUT 2.0 da ka Ministry of Housing and Urban Affairs, ka Sorkar India. Kane ka skhim kan shakri ha ka jingsam umbam umdih sha ka sor Williamnagar haduh u snem 2050.
Hapoh ka Phase-I jong kane ka projek, yn shna ïa ka jaka pyntuid um, ka jingshna ïa ka 500mm dia MS Gravity Main, ka jingshna ïa ka Treatment Plant, ka jingshna ïa ka MS Feeder Mains, ka jingshna haduh phra tylli na ki 14 tylli ki Elevated Service Reservoirs bad ka jingshna ïa ka jaka pynïaid ïa ki pipe um HDPE sha ki saw tylli ki Wards jong ka sor ha kaba 7229 hajar tylli ki longing kin ïoh jingmyntoi.
Kiwei pat ki jnit ki jnat jong kane ka projek ka long ban shna ïa ki hynriew tylli ki ESRs, ka distribution system ba thymmai ban pynpoi ïa ka um shi thliew iing, ban shna ïa ka surok, ban pynïaid ïa ki pipe um, ban shna ïa ki jaka sah jong ki nongtrei ha WTP & Control Area, ban pynkhuid ïa ka um bad ban buh ïa ka monitoring system (SCADA) ha kaba yn sa pyntreikam ha ka Phase-II.
Ha Williamnagar Urban Area, ki don 48 tylli ki dong bad ki ophis Sorkar, 56,412 hajar ki nongshong shnong bad 7,992 tylli ki rympei iing katkum ka khana samari jong u snem 2011 da kaba kynthup lang ïa ki shlem ai jinghikai bad ki ophis treikam.
Ka jingthmu jong kane ka skhim ka long ban pynkhreh lypa na ka bynta ki 15 snem ki ban sa wan kata ha u snem 2030 ka jingbun briew kan long 96447 hajar ngut bad ka jingbun briew ha ki 30 snem ban sa wan kata haduh u snem 2045 kan kot haduh 1,42,118 lak ngut..
Ïa ka tyllong um la tip kyrteng kum ka wahduid “Chibe” bad ha ka por tyrkhong um la shem ba kane ka wahduid ka dei ka bym ju rngad bad kaba lah lah ban pyndap ïa ka jingdonkam um lyngba kane ka skhim haduh 8,33,335.00 lttar shi sngi.
Ka jingheh jong ka Treatment Plant ka long 15.00 Million litar shi sngi.
Haba kren ha kane ka jingïalang, u Myntri Rangbah u la pynpaw ka jingsngewnguh ïa u Myntri Khynnah ka Sorkar Pdeng uba la buh ïa u mawnongrim ha ka lyngkhuh sngi kaba 75 snem jong u (L) Purno A. Sangma.
U la pynpaw ruh ka jingsngewnguh ïa ka Ministry ka la kloi ban mang pisa na ka bynta kane ka projek na ka bynta ka bit ka biang jong ki paidbah ka jylla bad khamtam eh ka Sor Williamnagar.
U la ïaroh ruh ïa ka tnat PHE, ïa u Myntri ba dei peit, ïa u MLA kiba la shimkhia ban pynurlong ïa kane ka projek.
U la ïathuh ba ki bun ki projek hapoh ka water supply scheme ba la pyntreikam ha ka jylla baroh kawei kaba kot haduh t.2 hajar klur.
Haba pyntip shaphang ki song pynroi ba la theh ha East Garo Hills, u la ong ba ka projek kaba T. 25 klur ban shna i aka surok ha Williamnagar ka la ïaid shakhmat.
“Ka Sorkar ka la shimkhia ban wanrah jingkylla bad ka Meghalaya kan sa nang kiew irat ha ki 4.5 snem ban sa wan,” u la bynrap.
U Myntri Khynnah ka Sorkar Pdeng u u Kaushal Kishore haba kren ha kane ka jingïalang u la pynkynmaw ba u Myntri Rangbahduh ka ri u Narendra Modi u don ka jingsngewkhia ïa ka Thaiñ Shatei Lammihngi. U la ong ba ka Williamnagar Water Supply Project ka dei ka jingshimkhia jong ka Sorkar khnang ban pynthikna ba manla kawei pa kawei ka longing ha Williamnagar kin ïoh ïa ka umbam umdih kaba biang.
U Bah Renikton Tongkhar u la pynpaw ïa ka jingsngewnguh ïa ka Ministry of Housing and Urban Affairs kaba la mang pisa na ka bynta kane ka projek ha Williamnagar. U la ïaroh ruh ïa u Myntri Rangbahduh ka ri uba la pynbna paidbah ïa ka prokram Har Ghar Jal ka ban sa pynkylla dur ïa ka jylla Meghalaya lyngba ka misshon ban pynïoh umbam umdih sha baroh ki rympei iing.