Syrtok ki VEC ban pyntreikam ïa ka skhim NREGS ba ym pynlait pisa ka sorkar ïa ka bai thied tiar

Nongpoh, Nailar 22: Ka jingwan rah ka sorkar kmie ban pyntreikam ïa ka skhim MGNREGS ha kylleng ki jyla ka ri bad ha ki shnong ki thaw khamtam ha ki shnong nongkyndong ka la long shisha ka jingkyrkhu ha ka liang ka ioh kam ioh jam bad ha ka liang ka roi ka par jong ki shnong nongkyndong, hynrei ka jingbym lah ban pynlait pisa pat da ka sorkar ha ka por kaba biang kane ka la wan rah ka jingkynduh mawsiang ïa ki VEC kiba pyntreikam ïa kane ka skhim ha ki shnong ki thaw kumba la mang da ka sorkar.
Halor ka jingpyntreikam ïa kane ka skhim sorkar kmie, ha kine ki sngi la mih ka jingud jingnam na kiba bun ki bor pynïaid shnong khamtam ki VEC kiba dei ki nongpyntreikam ïa kane ka skhim, bad ka daw ka long ba ka sorkar kam ju lah ban pynlait pisa ha ka por kaba biang bad bun na ki kam ki jam ki la sahkut bad khlem da lah ban pyntreikam kumba thmu ban wan ka roi ka par sha ki shnong nongkyndong.
Katkum ka tyllong khubor ba la ioh lum da u Mawphor, ki katto katne ngut ki Rangbah Shnong kiba ym kwah ban pynpaw kyrteng ki la pynpaw ka jingeh kaba khraw ban pyntreikam hok ïa kane ka skhim bad ka daw ka long ba ka sorkar ym tang ba ka pynslem ban pynlait ïa ka pisa na ka bynta ka ‘Wages’ kaba long ka bainong bylla ki paidbah bad khamtam ka jingpynslem ban pynlait ïa ka pisa kaba dei na ka bynta ka Material.
La ioh lum jingtip ruh ba bun ki VEC ki hap ban shah ram na ka bynta ban thied ïa ki tiar ki tar (Material) bad la don ruh kiba la kyntait ban ai wat ki tiar ki tar kiba pyndonkam na ka bynta ban pyntreikam ïa kitei ki skhim ha ki shnong ki thaw bad ka daw bah halor kane ka jingshah ram ka dei namar ba ka sorkar kam pynlait bun ïa ka pisa na ka bynta ki Material.
La don ki nongïalam shnong kiba la pyntip ruh ba ka sorkar ka pynshlur ban shim kiwei kiwei ki kam pynroi ha ki shnong ki thaw da kaba ki kloi ban ai ïa ka Work Order bad kumno ki shnong kin pyntreikam lada ka sorkar pat kam lah ban pynlait ïa ka pisa ha ka por kaba biang, ong ki nongïalam Shnong.
Shuh shuh, ki la kubur ruh ba ka jingwan kane ka skhim sha ki shnong nongkyndong ka long shisha ka jingkyrkhu ha ka liang ka roi ka par bad ka ioh kam ka ioh jam ki nongshong shnong bad lada ka sorkar pat kam lah ban pynlait ïa ka pisa la ka dei ka Wages ne ka Material kane ka wan rah shibun ki jingeh ha kaba pyntreikam ïa kane ka skhim bad don ruh kiba la pyndep shibun ki kam pynroi ha ki shnong ki thaw bad khlem ka pisa pat kane ka wan rah jingeh bad teng teng tang ka kam kaba rim kaba ki la pyndep ym pat lah ban pynlait pisa bad ka phah pat da kiwei ki work order ha kaba kane ka buh jingeh shisha ïa ki VEC kiba long ki nongpyntreikam ïa kane ka skhim ha ki shnong ki thaw, ong ka tyllong khubor ba la ioh lum da u Mawphor na Ri Bhoi District.