Syrtok ki paidbah ka thaiñ Maheskhola ba shlei um, pan jingïarap na ka Sorkar

Ranikor, Jylliew, 21: Ki nongshong shnong jong ka thaiñ Maheskhola, South West Khasi Hills District, ki la phah da ka jingdawa ba kham eh sha u Myntri Rangbah jong ka jylla, u Conrad Sangma. Ha ka 16 tarik u Jylliew, 2022, na ka liang jong ki ki la phah jingpyntip ba ha katei ka tarik ka la don ka jinghap slap ba jur ha ka por shiteng miet bad kynsan kynsan ka jingshlei um ka la tap lut ïa ka thaiñ Maheskhola baroh kawei bad kumta ka thaiñ hi ka la shah pynjot shibun.
Ki la ïathuh ruh ha ka ïew Maheskhola ka la jot lut bad ym don khaw shuh, ki ïing ki sem ruh ki la jot la pra lut bad mynta lei ka jinglong jingman ha katei ka thaiñ ka la nang sniew namar ba ki paidbah ki la hap ban ïaid lyngba ki jingeh ba bun bad ki hap ban leit shna jaka shong jaka sah shipor hapoh khlaw.
Ym dei tang katta, ka surokbah na Ranikor sha Baghmara ruh ka la hap ban khang noh. Ki surok, ki jingkieng bad ki muri ruh ki la jot lut bad shah rah noh ha ka jingshlei um. Shuh shuh, ha ki hajar tylli ki jaka ha katei ka thaiñ ki la jia ki jingsyntuid noh jong ka khyndew na ki lum bad ki briew ki la kylla long khlem ïing khlem sem, shah thngan bad sngewduh jingkyrmen.
“Ngi la hap ban leit sah noh ha ki jaka sah shipor bad ap ïa ka jingïarap nano nano. Ym don uwei ruh u ba dang don ïa u khaw bad bun na ki tiar ki tar la shah rah noh ha ka um. Myntri Rangbah, kane ka dei ka kam ban shim khia kyrkieh”, la ong u Tushar Banai, u wei na ki nongshong shnong jong ka thaiñ Maheskhola.
“Ka sorkar ka dei ban ïohsngew ïa ka sur jong ngi. Ka dei ban shim ki lad ki lynti ban ïarap ïa ngi da kaba phah ki jingïarap kum ka bam ka dih, ki jaiñ ki nep, ki dawai dashin, ki tin sop ïing, ki tarpar bad kiwei de ki jingdonkam lyngba ka helikoptar”, la ïathuh ki nongshong shnong katei ka thaiñ.
La ong ruh ba ka don ruh kawei ka shnong kaba don ha West Khasi Hills bad South Garo Hills District, kaba kyrteng ka Khalu kaba la shah pynjot ha ka wah Rongkai ha ka step jong ka Sngi Thohdieng ka 17 tarik u Jylliew, 2022 bad kumjuh ruh ka jingshlei jong kane ka wah ka la pynjot ïa ki ïing ki sem, ki skul, ka community hall bad kumjuh ruh ïa ka ïingmane.
“Ki nongshong shnong jong ka shnong Khalu mynta ki la kylla long khlem ïing khlem sem, shah thngan bad hap ban sah ha ki jaka sah shipor. Ki donkam ruh ïa ka bam ka dih, ki jaiñ ki nep, ki dawai dashin, ki tin tap ïing, ka umbam umdih bad ïa kine ka dei ka kamran jong ka sorkar ban pynpoi sha ki nongshong shnong katei ka shnong”, la ong u Jimmychrist G. Marak, u nongshong shnong jong ka shnong Khalu.