Nongpoh, Jylliew 11: Ki paidbah nongshong shnong jong ki phew tylli ki Shnong ba hap naduh Bhoirymbong sha Kyrdem ki la hap ban mad ïa ka jingsyrtok ha ka leit ka wan, kaba dei na ka daw ka jingsniew palat ka surok kaba la pynjynjar shisha ha ka leit ka wan.
Kane ka surok kaba la sniew bha ka dei kaba pynïasoh na Bhoirymbong sha Kyrdem kaba don kumba 9 km ka jingjngai bad ka jingsniew palat ka surok ka la buh jingeh ïa ki paidbah ha ka leit ka wan.
Kumba la sakhi, kane ka surok ka dei ka surok kaba shu iehnoh khlem da maramot la bun phew snem mynta ha ka na ka daw ka jingbym maramot ne pynbha kane ka surok ka la dap tang ka thliew ka syar sudua kaba la buh jingeh shisha ban leit ban wan lyngba kane ka surok.
Kaba kham syrtok shuh shuh, ka dei hadien ka jinghap slap kane ka surok ha kiba bun ki jaka ki la kylla pung pynban da ka jinglang jong ka um bad ki don ki bynta ba sniew haduh ba la shem jingeh wan ban leit ki kali ki motor.
Kumba la ioh lum jingtip, ha ka jingshisha kane ka surok ka la don ka mang tyngka ba la pynmang da ka sorkar kaba la kot sha ka 17 klur tyngka ban siang rong ne pynbha ïa kane ka surok, hynrei wat la ka sorkar ka la mang tyngka ban pynbha ïa kane ka surok ba dang shem jingeh namar ba dang dei ka aiom slap.
Kane ka surok ka dei ruh ka surok kaba ki paidbah jong ki phew tylli ki shnong ki hap ban leit ban wan lyngba ki Kali ki motor bad kaba kham sngewkhia ka long ba na ka bynta ki khynnah skul bad khamta ha ka pang ka shitom bad ki Longkmie ba armet la shem jingeh ban ïaid lyngba kane ka surok sniew.
Kumba la pynpaw da kiba bun balang na ki paidbah nongshong shnong kane ka thaiñ ki la khmih lynti ba ka sorkar kan pynsted noh ban pyntreikam ïa katei ka projek kaba la mang da ki klur tyngka bad lada ka sorkar ka lah ban pynbha ne siang rong ïa kane ka surok kan long shisha ka jingkyrkhu na ka bynta ki paidbah jong ki phew tylli ki shnong ba hap ha kane ka thaiñ ha Ri Bhoi District.
