Syrtok ki paidbah ba sniew ka surok Mawthawpdah-Photjalei, ha u 2027 yn pyndep noh ong u MLA

Mawkyrwat, Rymphang 03: Ka HYC jong ka Mawthawpdah Area Unit da ka jingsngewkhia halor ka jingdonkam ka ïaid ka ïeng lyngba ki surok ka la ïoh ban leit ban ïakynduh ïa u Bah Renikton Lyngdoh Thongkhar uba dei u MLA Mawkyrwat Constituency, na ka bynta ban pynbha noh ïa ka surok na Mawthawpdah sha Photjalei ki shnong kiba hapoh ka South West Khasi Hills District.
Ha kane ka jingïakynduh na ka liang ka seng ka la phah da ka jingthoh halor ka jingdonkam kyrkieh jong katei ka surok da kaba kdew ba hadien ba ka seng ka la ïoh ïa ka jingpynsngew na ki paidbah nongshong shnong, halor ka jingbym don ïa ka surok kaba bha na Mawthawpdah sha Photjalei, kaba la buh jingeh shibun ïa ki paidbah nongshong shnong, khamtam ha ka pang ka shitom, ha ka kit ka bah ïa ki mar rep mar riang, kaba la ktah shikatdei eh ïa ka ïoh ka kot jong ki nongshong shnong.
“Ka shnong Photjalei ka don ïa ki jaka rep kiba seisoh bha. Ha kaba palat ïa ki 12 tylli ki shnong ba marjan ki pyndonkam ïa ki jaka rep hapoh jong katei ka shnong. Kumta, da ka jingbym don ïa ka surok kiba bha ka ktah shibun eh ïa ki nongrep jong ka dong ka thaiñ hi baroh kawei,” ong ka kyrwoh na ka seng.
Namarkata, da ka jingsngewkhia ka seng ka sngewban kyrpad ïa u MLA ba un peit lem ïa kane ka jingeh jong ki paidbah jong ka dong ka thaiñ, da kaba shim ïa ki sienjam ban pynbha noh ïa ka surok na Mawthawpdah sha Photjalei.
Halor ka jingpynsngew jong ka HYC Mawthawpdah Area Unit, u MLA u la kular ba katei ka surok ka la don hakhmat eh (first priority) ïa kaba u la angnud ba u leh ei ei noh ban pynurlong ïa katei ka surok. Ha kajuh ka por u la kular ruh ba la kumno kumno hapoh jong u snem 2027 katei ka surok kan sa urlong noh.
Kane ka long katkum ka kyrwoh khubor ba la phah da u bah Welman Kharlyngiong, General Secretary bad u bah Bonifirst Shangpliang, President ka HYC Mawthawpdah Area Unit.