Shillong, Naiwieng 25: Kan long kaei kaei ka jingeh ha kaba ki bor ba dei peit kim lah ban shim khia ïa ki jingdonkam jong ki paidbah, watla ka Sorkar jylla ka la mang pisa da ki klur ban pynitynad bad ban maramot ïa ka Ïewduh kaba kynthup ruh ïa ka jingtap noh ïa ki pipe um kiba long ka jingma bad jingthut shisha jong ki nongwan ïew kiba ju wan ïew ban wan thied wan pet manla ka Sngi, hynrei la ïohi ba haduh mynta kane kam shym pat la treikam satia.
Ha kaba iadei bad kane ka pisa kaba ym bakla kaba duna T. 25 klur na ka liang u Myntri Rangbah ka jylla u Conrad K Sangma u la dep pynbna ha ki bnai ba la dep ba ka Sorkar jylla ka la mang na ka bynta ban pynwandur thymmai, ban maramot bad ban pynitynad ïa ka Ïewduh kaba kynthup lang ka jingweng bad ka jingtap noh shapoh ïa ki pipe um ka PHE bad ka Shillong Municipal Board.
Hynrei la lap pat ba kine ki pipe um kiba la pynïaid naduh na khlieh Ïewduh kaba don ka top um ka PHE shaduh sha Motphran, hynrei dang bun pat kine ki pipe um hateng hateng ki dangsah kumjuh.
Ïa kane la lap ha Motphran kaba dei ka lynti ïaid kjat ki paidbah kaba don marpyrshah ka Apex Bank la ïohi ba kine ki pipe um ki la mih shajrong bad kiba lah ban boh bad pynjynthut ïa ki briew kiba ïaid ba ïeng manla ka Sngi na katei ka lynti ïaid kjat.
Kine ki pipe um kidei ruh kiba don ha ka jaka ba ju tong bad pynap um ki nongtong um manla ka step bad manla ka janmiet ha ki por bad kynta ba ju mih ka um.
Kane ka mat ban wengnoh ne ban tap noh ïa kine ki pipe um na baroh shi lynter jong ka Ïewduh kadei kaba la ju ïakren manla ka por haba ki heh ki haiñ ki ju wan jngoh bad jurip ïa ka Ïewduh hynrei ha kaba khatduh ka sah tang ha ki jingkular bad ban lehnoh hynrei haduh mynta mynne kam shym la urlong satia bad ladei shisha ba ki bior badei peit ki dei ban shim khia ha kaba ïadei bad kane kam.
