Nongpoh, Ïaiong 13: Tang ka daw ka jingmih ki huri hura bad ki kynrum ki kynram ha ka Shnong Jatalong kumba la mih ha ki lad pathai khubor ba ha kine ki khyndiat sngi bnai la mih ka jingïashoh ïa dat hapeng ki Samla Khasi bad ki Nepali bad ka long pat ka jingsngew khia kaba jur ba na ka daw katei ka jingjia ka la ktah pat ïa ka shongsuk shongsain ki paidbah bad khamtam ki nongshong shnong ba lui lui ki shah pynthud beit ha ki Pulit ka Assam.
Kum ban pynkynmaw, dang ha kine ki khyndait sngi ba la dep, ki lai ngut ki samla Khasi ki la shah kem ha ki Pulit ka Assam da kaba pharep ba ki thmu ban tang ïa ka jingkieng Umler bad kumba la pynpaw da ki paidbah Khasi ki la kynnoh ba katei ka jingleh ki Pulit ka Assam ka long kaba ym don nongrim satia ba kum ki trai shnong ki tip kham bha ïa kitei ki samla kiba ym ju don dak ban leh ïa ki kam sniew hapoh shnong hapoh thaw.
Kumba la ioh lum jingtip na kitei ki jingjia ba la jia ha kitei ki shnong khappud ba la pyrkhing ïa ka leit ka wan ki paidbah da ka jingthmu ban nym pynmih kino kino ki huri hura kiba ktah ïa ka shongsuk shongsain ki paidbah nongshong shnong bad ha kawei pat ka bynta ka la wan rah jingeh ïa ki paid Khasi ba ki paidbah kiba dei ki trai shnong ruh ki shah pynthud ha ki Pulit ka Assam ha ka leit ka wan na ka bynta ki jingdonkam bapher bapher.
Kumba la ioh ban ïa kren bad ki nongshong shnong katei ka thaiñ, ki la ong ba kaba sngewlyngngoh ka long ba ka jingteh pyrkhing ïa ki paidbah ka dei tang ïa ki paid Khasi kiba shong basah ha kitei ki shnong khappud ka Block II bad kane ka jingshah pynthud ruh ka dei ha ki Pulit ka Assam kiba ap pahara khlem da ithuh shuh wat ïa ki trai shnong kiba shong basah ha katei ka thaiñ.
La pynpaw ruh uwei u samla bym kwah pynpaw kyrteng da kaba u la ong, ba ngi sngewthuh ba lada don kano kano ka huri hura dei hi ban don ki bor pahara na ki Pulit ba peitngor ïa kino kino kiba pynmih jingklumar ne ki huri hura, hynrei kaba sngewsih pat ka long ba ki Pulit Assam ki don por ban pahara 24 kynta bad na ka liang ki Pulit Meghalaya pat kim lah ban pahara sah ha kitei ki jaka kaba buh jingeh pat ïa ki paidbah Khasi.
U la ïathuh ruh ki don ki paidbah kiba hap leit iew leit hat shaduh sha Mawlasnai bad ki don ruh kiba leit shim dawai haba pang ba shitom bad kine ruh ki shah pynthud ha ki Pulit ka Assam la kum ba kim dei k trai shnong na katei ka jaka ba kane ka la wan rah bha ka jingeh kaba khraw ïa ki paidbah nongshong shnogn kiba dei ki Khasi.
“Lada ka Assam ka lah ban buh ïa ki bor pulit ban pahara ha Jatalong bad Sabuda bad ha Umsohphoh ban peit pyrman ïa ka leit ka wan ki paidbah bad balei pat ka sorkar Meghalaya kam lah ban buh ïa ki Pulit ka Meghalaya ha kitei ki jaka khang ban shngaiñ ki paid Khasi” ong uwei na u Samla na katei ka thaiñ.
U la ïathuh ruh ba ki paid Khasi hi na ka por sha ka por ki syrtok bad mad ki jingjynjar ha kitei ki shnong khappud ba dang ka jia pud hapdeng ka Assam bad Meghalaya bad bunsien pat kim ioh ka jingïada na ki bor pulit ka Meghalaya bad dei tang ki Pulit Assam kiba ju pahara bad kiba ju pynthud ruh wat ïa ki trai shnong kiba shong basah na ki shnong ha kitei ki shnong khappud.
U la pynpaw ruh na ka por sha ka por ki pulit ka Assam tang shu don kano kano ka jingjia ki kem beit naphang ïa ki Khasi da kaba kynnoh da kumne kumtei bad kane ka la paw ruh dang shen ba haduh 3 ngut ki samla ki la shah kem khlem da leh ïa kino kino ki kam sniew ba ki Pulit ka Assam ki shu shim kabu.
Namar kata, na ka liang ki paidbah ki dawa na ka sorkar Meghalaya ruh ba kim dei ban shim sting bad kumba katei ki shnong ki dang ïa kajia pud bad wat ka Meghalaya ruh ka don hok ban buh ïa ki bor pulit haba don kano kano ka jingjia khnang lada don ki bor pulit na Meghalaya kan ai jingshngain ïa ki paid Khasi bad ruh ba ki Pulit kin nym ioh ban leh mon lada don ki bor pulit na Meghalaya kiba pahara bad peitngor ha kitei ki shnong khappud, la bynrap ka tyllong khubor ba la ioh lum da u Mawphor.
