Jowai, Ïaïong 06: Ka Sarot I Man ka kynhun jong ki 11ngut shi paralok, kaba labuh ïa ka thong ban ai snam sngewbha manla ka snem sha ka Jowai Civil Hospital Blood Centre kaba don ha pyrshah ka Panaliar Secondary School, Panaliar Jowai, mynta ka sngi ruh ka 5 tarik Ïaïong, 2025 ka la pynlong ïa ka Blood Donation Camp.
Ïa ka jingïalang ba lyngkot la pynïaid da u Riquoma Rq. Laloo, dkhot bad la ïoh ruh ïa ki kyntien na kiwei pat ki dkhot, ki kyntien ainguh ïa u Blei na u Sienmitre Sumer, kyntien shaphang katei ka sngi na u Shape Pasweth bad ki kyntien ai khublei na u Jait dao Sumer.
Ka Dr. I. Khyriem, Senior Medical Officer kaba peit ïa katei ka Blood Centre, ka la ai ka jingkren lyngkot bad ïaroh shikatdei eh ïa ka Sarot I Man, kawei na ki group kaba don shisha ka jingkitkhlieh ban ïarap ïa kiba donkam, kum ha kine ki bynta. Ka la ong ba ka Voluntary Blood Donation ka ai jingïarap ymtang ïa ki mynsiem ba donkam, hynrei ka ïarap ruh ïa ka Blood Centre ba kan ioh ban buh ïa ka snam bad ban ai sha kiba donkam ha kano kano kapor. Ka la aibor ai mynsiem bad khot ruh ïa kiwei ban wan shakhmat ban donate ïa ka snam jong ki, namar ka jingai snam ka pynkoit pynkhiah ïa ka met u ba ai ha ki ba bun ki liang. Ka ai jingmut ruh ïa ka Sarot I Man ban pynsngewthuh ïa kiwei da kaba pynlong ki kynja awareness prokram shaphang kane.
Ha ka jingkren jong u Shape Pasweth, u la ïathuh ba ka Sarot I Man, mynta la saw sien ka ladep ban ai snam ha kane ka Blood Centre. Ka group kaba don ka jingthmu ban ïarap ïa ki mynsiem badonkam jingïarap, ka la pynlong ïa kine ki prokram ha ka rat ka jong ka ruh kaba dang saw snem hi.
U la ong ba, naduh ba sdang ïa ka group, ki shait lei tai jingïarap sha ki shnong bapher bapher da ki sopti ne ki marbam, hynrei ynda ki la puson bha, ki lap ba kane ka Blood donation kadei kawei na ki mat treikam jong ka ban buh ha khmat duh. U bah Shape u la ai khublei kyrpang ïa ki Donors kiba don shisha ka mynsiem ban wan shakhmat ban donate ïa ka snam jong ki, ymtang ha kane ka por, naduh kipor ba mynshwa ruh.
Kiba ïashimbynta ban ai snam ki long, u Kyllimot Lhuid, u Ram Sumer, u Mariabud Paswet bad u Sienmitre Sumer ki badei ki dkhot ka Sarot I Man. Nalor kita, lawan ban ai sngewbha da u Firsterborn Dkhar, uba dei u Lecturer ka Jaiñtia Eastern College, Khliehriat; u samla Arsa Shylla na Panaliar Jowai bad u Heibor u Tre Syngkon, Waheh Shnong ka Dorbar Shnong Tpep Pale, Jowai.
Ha shuwa ban pynkut, u Riquoma u la ïathuh lyngkot ïa ka jingïaid lynti ka Sarot I Man, ka badei ka group kaba, ki dkhot ki don ka juh ka jingthmu ba kylluid mynsien ban ïarap ïa kiba donkam. U la khot ïa ka jingïatreilang kiwei ruh na ka bynta ka jingbha ha ki liang baroh.
