Jowai, Nailar 21: Ka Dorbar Shnong Chilliangraij ha ryngkat ka jingïatreilang bad ka Meghalaya Aids Control Society, National Health Mission shi bynta na ka jingrakhe burom ïa ka jingdap 75 snem ka Ri, ha kane ka 20 tarik kala pynlong ïa ka ‘Awareness Cum Voluntary Blood Donation Camp’ ha Jowai Civil Hospital Blood Bank, Jowai.
Na ka liang ki khun samla ka Dorbar Shnong Chilliangraij kila mih shakhmat ban synñiang ïa ka snam kiba la don haduh 10 ngut baroh kynthup ïa 2 ngut ki kynthei bad 8 ngut ki Shynrang.
U General Secretary ka DS Chilliangraij u ma Oriland Shylla haba ai jingkren ula ong ba kane ka jingsynñiang snam ka long shi bynta ban ai ka jingkyrshan lang bad ban pynim ïa ki mynsiem breiw kiba donkam jingïarap ha ka por ba kyrkieh.
Ula ong ruh na ka liang ka shnong kaba pynbeit ban pynlong ïa kane ka jingsynñiang snam 2 sien ha ka shisnem ha ki sngi ba kyrpang ka Ri India kum ka Republic Day bad ka Independence Day.
Katba na ka liang ka Dr. P. Shylla, Medical & Health Officer In charge Blood Bank, Jowai Civil Hospital kala pynpaw ka jingsngewnguh kaba khraw eh ïa ka Dorbar Shnong Chilliagraij kaba la shim ïa kane ka bynta ban synñiang snam ha Jowai Blood Bank na ka por sha ka por.
