Khliehriat, Risaw, 23: Ka Jaiñtia National Council (JNC) Khliehriat Circle ha ka sngi Palei ka la noh synñiang da ki nep syaid sha ki khynnah kiba la ri da ka Children’s Home Girls, Khliehriat West kaba hap hapoh ka jingkhmih jong ka Child Welfare Committee (CWC), East Jaiñtia Hills District.
Ha ka jingsam ïa kine ki nep syaid kum shibynta ka jingrakhe ïa ka jingdap hynñiew snem ka Jaiñtia National Council Khliehriat Circle la lamkhmat d au President u Bah Shanborlang Bamon bad u General Secretary u Bah bah Symboh Baïar Sumer.
Haba kren ha ka jingïalang ba lyngkot, u Bah Shanborlang Bamon u la sneng bad kyntu kynpham ïa ki khynnah la ri ha Children’s Home Girls kiba don haduh ar phew lai ngut bad u la pynshlur bad ai mynsiem ba kin long kiba minot ha ki jingpule bad long kiba trei shitom ban poi sha ka thong ban ïoh ïa ka lawei kaba phyrnai.
U la ai mynsiem ba kim dei ban duh jingkyrmen ha ka jingim hynrei da kaba trei shitom yn lah beit ban wanrah ïa u soh ba thiang bad ka jingkyrmen, jingkmen ha ka jingim. U la kitbok kitrwiang ruh ïa ki khynnah ba kin lait na kano kano ka jingpang jingshitom bad ba kin don ïa ka met kaba koit kaba khiah.
Shwa ban aiti ïa ki nep syiad, la pynlong ïa ka jingdwai ba la ïalam da u Assistance Secretary u Bah Defendcy Siangshai.
