Synñiang ka FKJGP da ki shuki bad kali kit met ïap ïa ka shnong bad Balang Presbyterian Lama

Khliehriat, Naiwieng, 23: Ka Federation of Khasi Jaiñtia and Garo People (FKJGP) Lama Unit East Jaiñtia Hills District, ha ka sngi Saitjaiñ ka la ai sngewbha shispah tylli ki shuki sha ka shnong Lama bad ai sngewbha ruh kawei ka kali kit met iap sha ka balang Presbyterian Lama.
U Bah Deihok Sumer uba dei u President FKJGP East Jaiñtia Hills District bad uba dei ruh u Waheh Shnong Bataw u la long kum u kongsan bad u la ong, “ka kam shakri ïa ki paidbah ka long kawei na ki jingshakri ïa u Blei, ka Temple kaba kordor tam ha pyrthei dei ka dohnud kumta la da ngi don ha kano kano ka kam lane ha kano kano ka jingshakri ruh lada ngim khuid ka dohnud kam myntoi eiei.”
U Secretary balang Presbyterian Lama dang ka mynsiem ka jingsngew nguh ïa ka FKJGP Lama Unit, u la ong ba ka Balang kam shym la khmih lynti ba kan ioh ïa kane ka jingai sngewbha da kane ka kali kit met iap namar kane ka dei ka jingdonkam jong ka balang kaba la thrang ban don noh kawei ka kali kit metiap kum ba don ki wei kiwei ki balang, u la ai ka jingkhublei bad jingiaroh ïa ka seng FKJGP Lama Unit namar ka jingiohi jngai jong ka kaba la kynmaw lem bad ai sngewbha sha ka Balang da kane ka kali ba kit met iap namar kane kan pynsuk ïa ki khun jong ka balang ha ba don kiba khlad.
U Secretary Shnong Bataw u Bah Ampli Rupsi uba la don lang ha katei ka sngi ha shnong Lama, u la ai ka jing iaroh ïa ka FKJGP Lama Unit ha kaba ka la lah ban leh shibun ki kam ba bha ha ka imlang ka sahlang kaba long ka jingmyntoi ïa ki paidbah.
U Bah Mission Syrti uba la kren na ka liang ka shnong Lama, u la pynpaw ka jingsngew kmen bad ai ruh ka jingkhublei ba ka seng ka la noh synniang sha ka shnong da ki shuki bad ong ruh ba watla ka FKJGP Lama Unit ka dang dei tang ka Unit kaba rit hynrei ka la lah pat ban leh kat ki ne ki kam ki ban long ka jingmyntoi ïa ka shnong ka thaw, u la ai ka jingkitbok kitrwiang ïa ka seng ba kan nang lah ban iaid shaphrang ha ki kam jingshakri ïa ka ri bad ka jaitbynriew kumjuh ruh ïa ki ka imlang ka sahlang.
Ha katei ka sngi la ioh ruh ka jingkren na u Secretary FKJGP Lama Unit, u samla Evanmiki Suchen bad kiwei kiwei bad ïa ki shuki la aiti da u kongsan sha ka Dorbar shnong Lama bad u President FKJGP- SEBA Circle, u samla Mathew Pajat u la ati ia ka kali kit met iap (mortuary trolley) sha ka Balang Presbyterian Lama.
Ïa ka jingialang ha shnong Lama la pyniaid da u President FKJGP Lama Unit, u samla Lamshwa Dong bad la ïa don ryngkat lang ruh u Organising Secretary FKJGP East Jaintia Hill District, u samla Andiwor Pala, Education Secretary, u samla Eladmi Suchen, u President SEBA Circle, u bah Mathew Pajat, Organising Secretary u samla u bah Omega Sumer bad kiwei kiwei.