Jowai, Lber, 11: Ka Sub–Divisional Magistrate, Amlarem Civil Sub–Division, Amlarem ka Anendya Raajsshre ka la pyntreikam syndon daka hukum U/S 163 BNSS hadien bala ïoh jingtip na Assistant Executive Engineer PWD (Roads) Border Road Sub-Division, Amlarem ba ka jingkieng Bridge No 1/1 kaba don ha wah Amphubon kaba 1 KM na ka surok Muktapur-Borghat kam long shuh kaba shngaiñ ïa ki kali heh kiba kit palat pud ban jam lyngba jong ka.
La ïathuh, na ka daw ka jingïaid jong ki kali ba kit palat pud ka la buh jingma lada ki dang bteng ban ïaid lyngba katei ka jingkieng, shuh shuh katei ka jingkieng lah ban pynïasoh ïa ki shnong khappud jong ka Dawki bad kumjuh sha Amlarem.
La pynjari ïa kane ka hukum kum ka lad ban ïada na ki jingmynsaw kiba lah ban wan jia ïa ki paidbah nongleit nongwan lyngba katei ka jingkieng kaba la shong synjor mynta.
Baroh ki kali heh kiba kit palat ïa ka jingkhia kaba 9 Metric Tons la bthah ba kim bit shuh ban ïaid lyngba ka jingkieng No 1/1 ha ka wah Amphubon kaba 1 KM na ka surom Muktapur – Borghat.
Na ka liang ka Anendya Raajsshre, IAS kaba dei ruh ka Sub – Divisional Magistrate, Amlarem Civil Sub –Division, Amlarem ka la pyntip kane ka hukum kan treikam noh mardor naduh ka 5 tarik u Lber, 2025 tad haduh ban da pynbna da kumwei pat.
