Sohra, Ïaïong, 17: Ki nongshong shnong jong ka shnong Ryngud kawei na ki shnong kaba dang hap ha ka thaiñ Sohra ki la duhei lut baroh khait ïa u Kwai namar ka jingther jong u lapbah lapsan uba jur ha kine ki khyndiat sngi kiba ladep.
Katkum ka jingïathuh jong ki nongshong shnong jong ka shnong Ryngud, u slap u la ther tyngeh baroh shitaïew ha kaba ki wahheh ki la kyrhuh bad ki wahduid ruh ki shlei lut kat haduh ba la mih ruh wat ki umpohliew ha manla ki jaka. Ym tang katta kane ka jingther jong u lapbah lapsan ka la wanrah pat ïa ka jingduhnong kaba jur ïa ki nongrep kwai ha kane ka shnong, namarba u kwai u la hap lut plaiñ na u dieng kwai wat uba dang lung bad u bym pat long ban die bad ban bam.
U Bah W.Shangpliang uwei na ki riewrangbah jong ka shnong u la ong, ki katto katne tylli ki kwai kiba la hap ban kheit ki la ïoh tang wei ar tylli eiei hynrei uba bun pat ki la hap ban shu thad ban pynlong kum u Kwai supari.
Kum ban shu pyntip, u kwai bad tympew jong ka shnong Ryngud u dei uwei na kiba mar bakongsan bha bad u dei ruh u markhaii uba long u budlum jong ka ïoh ka kot ïa kane ka shnong hynrei mynta u snem baroh shi shnong ki la mad ïa ka jingduhnong shaba palat namarba u kwai supari u dei uba tad dor bad u bym don ïew satia.
