Syllad ka eriong ha Ri Bhoi, julor bun ki ïing bad kynthup ïa ïingmane Katholik ha Nongdewsaw

Nongpoh, Ïaïong 11: Bun tylli ki ing ki sem bad kynthup ruh ki diengbah bad ki jingthung ki la julor na ka eriong kaba la wan syllad naphang ha ka miet sngi u Blei ha ki katto katne tyli ki shnong kiba hap ha Ri Bhoi District.
Kumba la ïoh lum jingtip na ki tyllong khubor, la ong ba ha miet sngi u Blei kata ha ka por 12 baje ei ei mynmiet ka eriong bah ka la wan ban lynshop ha Ri Bhoi bad ha kane ka jingjia bun tylli ki ing ki sem ki la jot bad pra kaba la wan rah ïa ka jingsngewsih kaba khraw na ka bynta kito ki longing kiba mad ïa kane ka jingjia ba sngewsih.
Ki shnong ba la shah ktah jur bha ha kane ka jingwan syllad ka eriongbah ha Ri Bhoi ki kynthup ïa ka shnong Nongdewsaw kaba hap ha Umsning C&RD Block bad kawei pat ka shnong ka dei ka shnong Umpyrdong ba hap ha ka Umling C&RD Block ha Ri Bhoi.
La ïoh jingtup ruh ba dang don bun kiwei ki shnong kiba la shah ktah ha kane ka eriong kum ha ka thain Bhoirymbong, Nongtraw, Nonglakhiat, Umden Mission bad kiwei kiwei ki shnong kiba ym pat ïoh ïa ka jingtip kaba thikna.
Kumba la ïathuh da u Rangbah Shnong ka Nongdewsaw, u Bah A.B Warjri, u la ong ba tang ha katei ka shnong ki la don haduh 15 tylli ki longing kiba la shah ktah jur bad ki ing ki sem ki la jot la pra bad shah rad ha kane ka eriong. Nalor ki ing ki sem ba la shah pynpra ha kane ka eriong kane ka eriong ka la rad naphang ruh ka ïingmane Katholik ha ka sh nong Nongdewsaw bad wat ki diengbah bad ki jingthung jingtep ruh ki la shah pynjot.
U la ong ruh kane ka jingwan syllad kynsan kane ka eriong bah ha katei ka shnong ka la wan rah ka jingduhnoing kaba khraw ïa kitei ki longing bad ym tang katta bun ki longing ki la donkam kyrkieh ka jingïarap na ka sorkar namar ba ki jingdon jingem ki la shah pynjot ha kane ka eriong bad ki la kylla khlem ing khlem sem.
Kum u Rangbah shnong katei ka shnong, u la buh ruh ka jingkyrpad sha ka bor sorkar bad ki nongmihkhmat ba kin shim khia lem halor kane ka jingshah ktah ki paidbah na ka jingwan pynjot ka eriong bad ha kawei ka bynta u la buh ruh ka jingkyrpad sha ki bor sorkar ba kin phah ban wan jurip khnang ba kin tip kham bha ïa kito ki longing kiba la shah ktah ha kane ka jingwan lynshop ka eriong, u la bynrap.
Ha kawei ka bynta, haba wad bniah ruh halor kane ka jingwan lynshop ka eriong bah ha Ri Bhoi, kitei ki shnong kiba la shah ktah ki la shah ktah ym tang ba ki shah pynjot ki ing ki sem, hynrei ki marbam mardih naduh u khaw, ki shini, ki kba bad ki jain ki nep ki la sniew bad julor, namar kane ka eriong ka la wan ryngkat u lapbah uba la pynsiew lut ïa baroh ki jingdon jingem hapoh ki ing ki sem.