Jowai, Naitung, 11: Ki paidbah nongleit nongwan bad ki shong die jingdie hajan ka surok Lad Ïawthymme Ladthadlaboh kila don hapdeng ka jingsyier mynsiem namar ka jingjia ba khah khah ka jingshah lymbub ki paidbah ha ki thuk thuk (ar shaka) kaba la jai manla ka sngi.
Mynta ka sngi ruh kala don ka jingshah lymbub kawei ka kynthei kaba la mynsaw ha ki bynta jong ki kjat, katba dang ha kane ka taïew ba ladep sngi saitjaiñ kawei ka longkmie kala mynsaw jur na ka jingshah lymbub bad la pynkit noh sha ka jaka ai jingsumar, ong uwei u rangbah ma W. Ryngkhlem uba dei ruh u President jong ki nongdie doh ba shong die hajan katei ka jaka.
Ula ïathuh ha u nongthoh khubor lyngba ka phone ba kane ka dei tang na ka daw ka jingñiah khlem akor ki thuk thuk ar shaka, kiba la ñiah stet nalor ba katei jaka ka long kaba bun briew bad ki kali kiba ïaid ba ïeng. Shuh shuh ula pynsngiew kum ki paidbah ki buh ka jingkyntu ïa ki bor ba dei peit ba kin shim khia ïa kane bad ban teh lakam ïa ki nongñiah thuk thuk kiba ñiah klumar bad la dei ruh ban buh da ki jingmana ha kitei ki bynta khnang ba lait na ka jingmynsaw bad ka jingshah lymbub ki paidbah.
Ula ong ruh lada ym don sa ki pulit ba pynïaid kali ha katei ka jaka kala nang kham jur shuh shuh ka jingshah lymbub thuk thuk kaba la pynshong syier mynsiem ïa kiba bun ba lang.
