Syier ki nongshong shnong ba ïoh EPIC da kaba suk ki mynder ri lada treikam ka SIR, ong ka HITO

Shillong, Rymphang 01: Ka Special Intensive Revision (SIR) haba ïadei bad ki electoral roll ha Meghalaya ka la wanrah ki jingsngewkhia hapdeng ki kynhun sengbhalang trai ri trai muluk, kiba la pynpaw ka jingtieng ba kane ka jingpyntreikam ka lah ban shah ïa ki bym dei ki nongshong shnong ban ïoh ïa ki Electoral Photo Identity Cards (EPICs) da kaba pyndonkam ïa ki Aadhaar card.
Halor kane ka Hynñiewtrep Integrated Territorial Organisation (HITO) ka la pynpaw ïa ka jingma, da kaba kdew ba ka SIR kam khang ïa ki bar ri ban ïoh ïa ki EPIC, kyrpang hadien ba ka Supreme Court ka la pynpaw ba ïa u Aadhaar lah ban pyndonkam kum ka kot ka sla ban aplai ïa ka EPIC.
Ka jingsuba ka ïeng pdeng halor ka jingshisha ba ïa ki Aadhaar card lah ban ai ïano ïano kiba la shong la sah ha India la kumba 182 tylli ki sngi ne kham palat, watla kim pat ïoh ïa ka jinglong ne jingithuh kum ki nongshong shnong.
Kane ka la lam sha ki jingsngew tieng ba ki briew kiba nabar ka jylla, kynthup ki nong Bangladeshi, kin lah ban ïoh ïa ki EPIC da kaba pyndonkam ïa ki Aadhaar card.
U President ka HITO u Bah Donbok Dkhar u la kyntu ïa ka Election Commission ba kan pan ïa kiwei pat ki kot bynrap, kum ki syrnot ba la ai da ki Hima, ki Raid, Elaka, bad ki Dorbar Shnong, ban pynshisha ïa ki kyrdan long trai ri trai muluk jong ki.
“Ka long kaba ma ba ki briew kiba nabar ka jylla ki lah ban ïoh da kaba suk ïa ki Aadhaar card. Ma ngi kum ki sengbhalang ngi la shem ba wat ki nong Bangladeshi ki don ïa ki Aadhaar,” ong u Bah Dkhar.
Ka Supreme Court dangshen ka la pynpaw ba ïa u Aadhaar lah ban pyndonkam kum ka kot ka sla kaba shisha na ka bynta ban ïoh ki jingpynithuh ha ka por ba leh ia ka SIR, hynrei kam dei pat ka sakhi ban kam ïa ka jinglong nongshong shnong.
Ka Ïingkashari ka la banjur ruh ïa ka Election Commission ba kan pynshisha ïa ka jinglong ba thikna jong ki Aadhaar card khnang ban lah khanglad ïa ka jingpyndonkam bakla.
Halor ka mat jong ki katto katne ngut ki nongshong shnong kiba sah ha ki thaiñ khappud kiba don ïa artylli ki EPIC, u Bah Dkhar u la ong ba dei ban bishar bniah ba ki nongshong shnong ka Assam kim dei ban don ïa ki EPIC ka Meghalaya kumjuh ruh kiba na Meghalaya kim dei ban don ki EPIC sha Assam.
U President ka HITO u la kdew ruh ba ki la don ki khep bad ki jingjia ha kaba ki nongshong shnong ka jylla Assam ki kam ba ki dei ki nongshong shnong ka Meghalaya bad ki ïoh ïa ki jingmyntoi. U la ong ba shen ka seng jong u, kan sa leit ban kynduh ïa u Chief Electoral Officer u BDR Tiwari, ban pynpaw ka jingsngewkhia ka jong ki bad ba kin ai jingmut ruh ïa u ha shwa ban pyntreikam ïa ka SIR ha Meghalaya.