Shillong, Nailar 01 : Ka Khasi Hills Autonomous District Council (KHADC) ha ka sngi Nyngkong ka la shim ïa ka rai ban pyntip sha ka sorkar jylla ba ki MDC jong ka Council ki pyrshah jur ban pyntreikam ïa ka Civil Procedure Code (CPC) bad Criminal Procedure Code (CrPC) ha baroh kawei ka jylla halor ka nongrim ba ka don ka jingsyier ba ki kashari jong ka District Council kin sa tlot bor noh.
“Lada pyntreikam, kan pyntlot bor naduh ki district council court, haduh ki subordinate court ne ki kashari jong ki Hima bad ruh ki village court lane ki kashari ha ki shnong. Kumta na ka liang baroh ki MDC kiba poi sha kane ka jingïalang ngi la shim ïa ka rai ban pyrshah ïa kane,” ong u Bah Titos W Chyne haba kren bad ki lad pathai khubor hadien ba la wai ka jingïalang jong ki MDC.
Da kaba pyntip ba watla ka sorkar ha ka jingïalang bad ki stad aiñ jong ki Council kaba long ha ka taiew ba la dep ki la rai ban sa phah ïa ka Draft sha ki Council khnang ban ai ïa ki jingai jingmut jongngi sha ki.
“Mynta katba ngi dang ap ïa ka Draft na ka sorkar na ka bynta ban bishar bniah ngi la rai ban pynsngew noh sha ka sorkar ba ngi pyrshah jur ïakane ka sienjam,” bynrap biang u CEM. Katkum ka jingong jong u, baroh ki MDC ki la dep ban pynpaw ha ka jingïalang ba ki sngewkhia haduh katta katta namar kan ktah beit ïa ka iktiar jong Council.
“Dei halor kane ka nongrim ba ngi la rai ban ai da ka Resolution sha ka sorkar jylla ba kane ka bor kam dei satia ban ktah pat ïa ka bor jong ki District Council kiba la don lypa,” u la ong. Katkum ka jingïathuh jong u, lada treikam kane, ki district session court jong ka sorkar kin sa ïoh lang ïa kajuh ka bor ba ki district council court ki don mynta.
