Swami Vivekananda Men’s Under-20 NFC 2025: Pynliem ka Mizoram ïa ka Punjab, yn aireng ïa ka Meghalaya ha ka semi final
Narainpur (Chhattisgarh), Jymmang 23: Ka Mizoram ka la ïoh ïa ka jingjop ha ka Quarter final jong ka Swami Vivekananda Men’s U20 National Football Championship da kaba pynliem ïa ka Punjab lyngba ka penalty hadien ba ka Punjab ka la wanphai ban pynïakhaid watla shah lamkhmat ar kol. Katei ka kynhun jong ka thaiñ shatei lam mihngi ha kaba kut ka la jop ïa ka jingïakhun da 4-2 ha ka tie breaker namar ka jingïalehkai ka la kut ha ka jingïakhaid da mar 2-2.
Ka la long ka jingïalehkai kaba don jingkylla ha baroh ar kylla, bud sa ka por ba la pynjlan kaba shiteng kynta khlem da don mano mano ba thep. Ka Mizoram ka la long kaba khlaiñbor ha ka kylla step, ha kaba u Michael Lalbiaksanga (10’) bad u PC Pazawna (23’ p) ki la buh hakhmat ïa ka kynhun. Hynrei ka Punjab ki la ïakhun tyngeh ban wanrah ïa ka jingkylla ha ka kylla miet, da kaba thep ar tylli ki na u Akashdeep Singh (69’) bad Arshvir Singh (80’ p) ban pynïakhaid bad rah ïa ka jingïakhun sha ka extra time.
Hadien ka jingïakhun kaba khlem thep kol ha ka extra time, ka Mizoram khatduh ka la pynskhem ïa ka jingkyrmen jong ka ban jop da 4-2 kol lyngba ka penalty ban jam sha ka semi final.
Da kane ka namjop kan pynkhreh ban ïakhun pyrshah ïa ka Meghalaya ha ka Semi Final ha ka Sngi U Blei ha ka por 3 shiteng janmiet.
Haba phaidien, ka Meghalaya ka la buh jaka ïalade ha ka semifinal jong ka Swami Vivekananda U20 Men’s National Football Championship 2025 hadien ba ka la jop salit da 1-0 kol ïa ka Karnataka. Ka la pyndep ïa ki jingïalehkai na ka Group A ha ka kyrdan ba nyngkong da kaba jop baroh lai sien lynter ki jingïakhun, ka la jop kput haduh 7-0 kol ïa ka Bihar, nangta da 2-1 kol ïa ka Kerala bad da 4-0 kol ïa ka Rajasthan.
Ha kawei pat ka semi final ka Delhi, kaba dang ïada ïa ka burom lahduh, kan ïakhun pyrshah ïa ka Sports Authority of India ha ka jingïalehkai ba nyngkong ha kajuh ka sngi (sngi U Blei), ha ka por 7:30 mynstep.
Baroh ar tylli ki jingïalehkai kin long ha Ramakrishna Mission Ashrama Ground bad yn pyni live ïa ki ha ka Indian Football YouTube channel.