Jowai, Naiwieng 08: Ka lympung ïalehkai phutbol jong ka kyrdan ‘Super Division Football Tournament – 2024’ ïa kaba la tip kum ka “U Kiang Nangbah Memorial Trophy” bala pynïaid da ka West Jaiñtia District Sports Association, (WJDSA) Jowai kaba la long ha ka 08 tarik u Naiwieng ha madan Kiang Nangbah Stadium, Dongmihsngi Jowai.
Ha ka jingïakhun kaba nyngkong ka Nangbah Mulang kala pynliem kput haduh 10-1 kol ïa ka Shangpung Lumiawmuchai.
U Niponghi Sumer u la khyrwit hat trik (39, 52 & 76), na bynta ka Nangbah Mulang, katba u Suting Syrti (5’), u Bastanlangmi Sutnga (17’), u Pynshai Lanthong (27’), u Mediphrangki Pohleng (55), u Timmy Ryngkhlem (82), u Soniroy Suchiang (88) bad u Civility Khongmalai (90+2) ki la ïoh mar kawei. Ka shikol na ka Shangpung Lumiawmuchai la thep da u Mewathi Sungoh (42).
Ka jingïakhun kaba ar hapdeng ka Demthring bad ka Wahiajer kila poi sha ka jingïakhaid da mar 1-1 kol. Ka Wahiajer ka la thep nyngkong lyngba ka kol u Deciduous Pyrtuh (7) hynrei ka Demthring ka la pynïakhaid lyngba u Justerwell Tham (90+2).
La pyntip ka jingïakhun haka 9 tarik u Naiwieng, 2024 ka long hapdeng ka 7 Wasa United pyrshah ïa ka Sailung Ialong ha ka por 11 baje mynstep, katba ka Mukhla Raij SC kan ïakhun pyrshah ïa ka Ladthadlaboh ha ka por 2 baje nohphai sngi.
