Sumar ïa ki tyllong um hapoh shnong, pynsngewthuh ka Jal Jeevan Mission ïa ki paidbah ka SWKH

Mawkyrwat, Lber, 30: Ka University of Science & Technology Meghalaya (US&TM) mynta ka sngi ka la pynkut noh ïa ka jingai jinghikai ba saw ne ka 4-Days Residential Training under JJM na ka bynta ki Village Water & Sanitation Committees (VWSCs) jong ka South West Khasi Hills District kaba la pynlong hapoh PHE Hall Mawkyrwat.
Ïa katei ka jingai jinghikai la kyrshan da ka Ministry of Jal Shakti, jong ka Sorkar India ha ryngkat lang ka Sorkar Jylla ban ai jinghikai ïa ki VWSCs khnang ba kin dup lah ban sumar, test, pynkhuid bad maramot ïa ka umbam umdih ha ki shnong ki thaw ba la pynpoi lyngba jong ka skhim Jal Jeevan Mission.
Haba kren kum u kongsan ha ka sngi pynkut, u I/c Executive Engineer, PHE, Mawkyrwat Division, bah R. Nongdhar, SDO Mawkyrwat Sub Division u la ai khublei ïa ki dkhot jong ki VWSCs ba ki la ïashimbynta ha ka prokram jinghikai na ka bynta ban sumar ïa ka umbam umdih ha ki shnong ki thaw jong ki, u la kyntu ba kin pyndonkam hok ïa ki jinghikai ba ki la ïoh ha kaba ïa dei bad ka umbam umdih bad kumjuh ruh ban long ki nongrahkhubor sha ki nongshong shnong ba kin long ki ‘captain’ ban ïalam ïa ka shnong ka thaw.
U la ong ruh ba ka long kaba donkam eh ban pynneh pynsah ïa ki tyllong um bad kiar na ka jingpom pathar ïa ki dieng ki siej ïoh ba lada kim sumar ïa ki kan sa poi ka por ba ‘ka um kan kham kordor ban ïa ka ksiar’ bad kin sa kyrduh um. U la ïathuh ruh ba ka tnad PHE ka pyrshang ban ai ki jinghikai bapher bapher kum ban leh mapping, testing, bad ban sumar ïa ki tyllong umbam umdih ha kajuh ka por ruh ban lehkhuid hynrei la da ki paidbah kim ñiewkor kan sa shu pulom kai ka jinghikai.
Ka Dr. Nibedita Paul, PD, KRC, Jal Jeevan Mission ka la ïathuh ba ka Ministry of Jal Shakti, jong ka sorkar India bad ka sorkar Meghalaya ki la jied ïa ka US&TM ban ai pynlong bad ai jinghikai ha kaba ïa dei bad ka skhim Jal Jeevan Mission.
Ha katei ka sngi pynkut la ïoh ka jinghikai na ka kong Zera Wahlang, Water Analyst, PHE Mawkyrwat halor ka phang kumno ban test ïa ka um naduh na tyllong bad ynda la poi ha ki ïing ki sem. Ka la ïathuh ba ki don kumba khyndai jait ki jingtest ba dei ban leh bad kita ki kynthup ïa ka Ph test, Jingjngut, total Hardness, Chloride Test, Free Chlorine, Iron (fe), Nitrate, Fluoride bad Bacteriological Test.
Ki Nongai jinghikai (master trainer) ki kynthup ruh ïa ka Dr. Nibedita Paul, PD, KRC, Jal Jeevan Mission, u Er. P.P. Sharma, Technical Expert, JJM, u Rituparna Borkataki, MIS Expert, JJM bad u bah Onessimos Shangdiar, Training Coordinator.
Haba pynpaw ïa ka jingïoh jingmyntoi na katei ka jinghikai ba 4 sngi, uwei na ki nongïashimbynta, bah Khrawkupar Shangdiar, dkhot jong ka VWSC Photjaud War u la ong ba nyngkong eh u la tip kumno ban sumar bad test ïa ka um shuwa ba kin pyndonkam ïa ka ban lait na ka jingpang, kumno ban sumar (maintain) ïa ka um ba ïoh lyngba ka JJM khnang ba ka shnong ka thaw kan pahuh ha ka umbam umdih, kumno ban buh ïa ki jingïalang ba ïa dei bad ka um, ban buh ki kot ki sla bad ban lum ïa ka bai um khnang ban sumar ne maramot lada ka duh ka um bad kumno ban tyngkai ïa ka um da kaba kin don ka jingieid bad burom ïa ka mariang. Ha kajuh ka por u la pynpaw ruh ïa ka jingsngewnguh ïa ka kynhun na US&TM ba ki la ai ïa ka jinghikai ba 4 sngi ïa ki.
Ïa katei ka porkram pynkut la pynïaid da u bah Onessimos Shangdiar, Training Coordinator, la kren pdiang sngewbha da ka Dr. Nibedita Paul, PD, KRC, Jal Jeevan Mission, na ka liang ki nongïashimbynta la kren ai khublei da ka kong Twildaris Syiemlieh, member VWSC Rangthong bad la kren pynkut da u Rituparna Borkataki, MIS Expert.