Nongstoiñ, Naitung 18: Ka jingpyntrei ia ka surok Nongstoiñ -Maweit ka long kaba suki shaba palat, ha kaba ki paidbah ka West Khasi Hills ki sakhi lut ïa kata. Kaba sah mynta ka dei sa 12 kilometer ban pyndep ban shna naduh Umran haduh Maweit. Kane ka dei ka surok 23 kilometer naduh Nongstoiñ haduh shnong Maweit.
Halor kane ka nongrim, ka Hynñiewtrep Youth Council Maweit circle, ha ka sngi thohdieng 18 tarik Naitung ki la leit ban ïakynduh ïa u Executive Engineer ka tnad PWD Nongstoiñ Division, ban kyntu ïa u ba un bthah ïa u kontraktor ba un pynsted bad ban pyndep noh ïa ka jingpyntrei ïa katei ka surok.
U bah Maxmilando Umïong Secretary bad u bah Shemphang Tyrsa President ka HYC Maweit circle, ki la ong ba ka jingleit ïakynduh jong ka seng ïa u Executive Engineer, ka dei ha dien ba ki la ïoh copy ïa ka work order bad ha katei ka work order ka sorkar lyngba ka tnad PWD, ka la bthah ba u kontraktor u ba pyntrei ïa katei ka surok, u dei ban pyndep hapoh ka 25 tarik u bnai Nailur mynta u snem.
Hynrei, haba peit pat ïa ka jingpyntrei ïa katei ka surok u kontraktor um pat lah ban pyndep wat tang marshiteng na kaba u dei ban pyntrei. Ki nongïalam ka seng ki la ong ruh ba ha ka jingleit ïakynduh ki la aiti ruh da ka jingthoh sha u EE ka PWD ba un leh ïa kaba donkam.
Nalorkata, la ong ba ka jingsuki ban pyntrei ïa katei ka surok ka la wanrah ïa ka jingsahkut jong ki kali kiba kit ïa ki nongleit nongwan bad ka la pynjynjar ruh ha ka kit ka bah namar ka jing sniew jong ka surok ka la long shaba palat.
Ha kajuh ka por la ong ba ka por kaba sah ban pyntrei ïa katei ka surok katkum ka work order ka sah satang kumba ar bnai ei ei. Dei halor katei ka nongrim ba ka seng ka la shimkhia ban leit pynsngew ha u Executive Engineer ba un bthah ïa u kontraktor ba un pyndep noh kloi ban pyntrei ïa katei ka surok.
