Nongpoh, Nailar 10: Ban dang pynkhlaiñ ïaka party bad kumjuh ruh ban pynsuhthied haki constituency bapher bapher ha Ri-Bhoi District bad ka jylla baroh kawei, ki nongïalam ka All India Trinamool Congress mynta ka sngi kila hiar sha Jirang Constituency naka bynta ban pynskhem ïaki nongkitkam ba pura jong ka Jirang Block ha kaba la thung ïa u Sunmoon Marak kum u President u ba dei ruh u kyrtong ka party TMC ban ïakhun na Jirang Constituency haka jingïalang kaba la long mynta ka sngi ha Byrnihat.
Ha katei ka sngi ka jingpynskhem ïaki nongkitkam ba pura jong ka TMC Jirang Block la sakhi ruh da ka jingdonlang u Dr. Mukul Sangma President ka TMC haka jylla u ba dei ruh u nongïalam ka liang pyrshah, u Bah George B Lyngdoh Vice President ba dei ruh u MLA ka Umroi Constituency, Bah James Lyngdoh Vice President, Dr. Fabian Lyngdoh Secretary, ka Dr. Saralin Dorphang ka President ka Mawhati Block bad kiwei kiwei ki riew rangbah.
Haba kren ha katei ka sngi naka liang u Sunmoon Marak kum u kyrtong ban ïakhun naka party TMC na Jirang Constituency u la ong baka Jirang kala donkam ïaka jingkylla bad ki paidbah ki dei ban sngewthuh shai, kumba kane ka sorkar MDA kam phai khmat eiei sha kitei ki thaiñ kumba la sakhi ruh ba ki paidbah ka thaiñ khappud ki hap ban mih naka por shaka por ban pyrshah halor ka jingpynngat ïa bun tylli ki shnong sha ka jylla Assam.
U la ong ruh ba dei ha kane ka kynti ba mynta da ka jingdon ki nongïalam ba stad jong ka TMC yn sa lah ban thaw dur bad thaw thymmai ïaka Jirang Constituency khamtam ban peit ïaka eh ka shon jong ki paidbah ka thaiñ khappud.
Naka liang u Dr Mukul Sangma haba kren ha katei ka sngi hadien ka jingpynskhem ïaki nongkitkam ba pura jong kaJirang Block u la pynpaw ka jingsngewkmen ban iohi ba ki paidbah ki don ka jingshañiah haka party TMC ka bym pat don dak sniew eiei haka jylla kaba dei ruh ka party kaba don ka jingangnud ban wanrah ki jingkylla bad ban trei naka bynta ki paidbah.
U Dr Mukul u la ther ruh ïaka sorkar MDA hapoh ka jingïalam jong ka NPP, ka jylla don hapdeng ka jingeh kaba khraw naduh ka thungkam thungjam bun ki samla ki mad jingeh watla ki don shibun ki kam kiba lait haki ophis sorkar, namar ka sorkar MDA kam don ka jingkitkhlieh, hynrei la iohi pynban ba ki nonghikai ki hap ban thiah surok, ki nongtrei ASHA ki hap ban mih surok, ban dawa ïaka tulop ban pyndap ïaka iing ka sem.
U la khot ruh ïaki paidbah ha katei ka sngi ba kidei ban sngewthuh shai ïaka nongrim jong ka party TMC naka bynta ban wanrah ki jingkylla ha ka thaiñ Jirang bad ka jylla baroh kawei khamtam bun ki paidbah haki shnong khappud ki mad jingeh naka jingpynbeit pud hapdeng ka sorkar Meghalaya bad Assam bad la shah pyn ngat ruh bun ki jaka sha Assam kiba la tip shai ba kidei ki shnong ka jylla Meghalaya khlem da sngew bad sngap ïaka jingkyrpad jong ki paidbah.
Lyngba katei ka sngi u la kyrpad ruh sha ki paidbah ka thaiñ Jirang ba ki dei ban phaikhmat sha ka party TMC bad ban pynjop donburom ïa u Sunmoon Marak u ba dei u kyrtong bala ih jong ka party na katei ka constituency u ba dei ruh uwei naki nongïalam ka Garo Student Union, Ri-Bhoi Regional Unit.
