Subroto Mukherjee Cup: Rah namlahduh ka Umphyrnai bad ka Assam Rifle na ka thup ki shynrang, ka ïewrynghep jong ki kynthei

By Mawphor Editor On Jul 3, 2023

MFA Turf-Polo, Naitung 02: Ka lympung ïalehkai District Level Inter School Subroto Mukherjee Cup Football Tournament 2023 ba la pynïaid da ka ophis jong ka District Sport Officer jong ka East Khasi Hills ka la jam sha kaba kut hynnin ka Sngi Saitjaiñ jong ka taïew ba ladep, bad ïa ki jingïakhun final baroh bad kynthei bad shynrang la pynlong ha madan MFA Turf Polo.
La ïoh ban sdang nyngkong ïa ka final jong ki kynthei under-17 ha ka por 9 baje mynstep (ïewrynghep vs H.Elias), nangta bud sa ka final jong ki khynnah under-14 ki synrang (Umphyrnai v Assam Rifle) bad kaba khadduh ka final hapdeng ki samla lud under-17 jong ki shynrang (Assam Rifle vs H.Elias).
Shuh shuh ha kane ka sngi la ïoh ruh ban ïadonryngkat lang ki Principal jong kine ki skul kiba la poi sha ka final jong kane ka lympung bad i DSO jong ka East Khasi Hills ryngkat ruh bad u player ba kynsai jong ka jylla, u Wailad.
Haba phai sha ka final kaba nyngkong hapdeng ki samla lud kynthei hapdeng ka skul ïewrynghepSec. School kaba aireng pyrshah ïa ka H.Elias Memorial School ka la jam sha kaba kut ha kaba ki thei ïalehkai jong ka ïewrynghep ki la lah ban khur ïa ka namjop da 2-1 kol ban rah ïa ka namlahduh.
ïa kine ki ar kol na ka bynta ka ïewrynghep la thep da i Ibalari Nongrum ha ka minit kaba 20 bad kaba ar ha ka 43 minit na i ïaraplang Nongrum, katba ïa ka shi kol na ka bynta ka H.Elias la thep da i Ridalin Suting.
Haba phai pat sha ka final jong ki khynnah Under-14 shynrang, ka skul Umphyrnai Pres. Sec School ka la lah ban rah ïa ka namjop lyngba ka tie breaker pyrshah ïa ka Assam Rifle Public School.
Ka jingïakhun hapdeng kine ki ar kynhun ka la long kaba ïakhaid bad baroh arliang ki la ïoh ban thep mar 2 kol shuwa ban jam sha ka tie breaker. Ha ka jingïashut ïa ka tie breaker, ka Umphyrnai ka la lah ban pyrung 4 kol katba ka Assam Rifle tang 2 kol, kaba la pynlong ïa ki khynnah jong ka Umphyrnai Pres. Sec School ban rah ïa ka namlahduh na ka thup kyrdan ïakhun ki khynnah Under-14.
Katba ka jingïalehkai kaba khadduh hapdeng ki samla lud Under-17 jong ka skul jong ka skul Assam Rifle Public School pyrshah ïa ka H.Elias Memorial School ka la jam sha kaba kut hadien ba ka Assam Rifle ka la ïoh ban rah ïa ka namlahduh lyngba ka tie breaker.
Haba phai sha ka jingïakhun hapdeng kine ki arliang mamla ka jingïalehkai ka la ïaid shaduh kaba kut jong ka 90 minit khlem shym la don ba lah ban pynkhihjar bad wat hadien ba la kut ka Extra time ka kol ka la sah kumjuh.
Ha ka jingïashut ïa ka penalty, ki samla lud jong ka Assam Rifle ki la lah ban pynrung haduh 4 kol (u Iminstar Mawlong, u Thoudam Dilson Singh, u RosangZela Tlau bad u Phermanbha Lyngdoh), katba na ka liang jong ka H.Elias ka la ïoh ban pynrung tang 1 kol (Andy Khmah) kaba la pynlong ïa ka Assam Rifle ban rah ïa ka namlahduh ha ka thup kyrdan Under-17.