Mawkyrwat, Naitung, 05: Ki ar tylli ki kynhun jong ki khynnah kynthei kiba hapoh ka 17 snem karta ba kynthup ïa ka Rangthong Christian Higher Secondary School (RCHSS) bad ka Lyngdoh Wanniang Secondary School, Marshilong (LWSSM) ki la ïoh rung sha ka phainal ha ka lympung ïalehkai jong ka South West Khasi Hills District Level Inter-School Subroto Mukharjee Cup Football Tournament 2022 ba la pynïaid da ka ophis jong u District Sports Officer, South West Khasi Hills District hapoh madan Artificial Turf, MDSA, Mawkyrwat.
Ka jingïoh rung jong ka Rangthong Christian Higher Secondary School sha ka phainal ka long hadien ba ka la pynliem noh ïa ka Rodphod Secondary School da 1 – 0 kol ha kaba ïa kane ka shikol la ïoh ban thep da ka Eightfulness Shangdiar ha ka minit kaba 34 kaba dei ha ka jingïalehkai jong ka kyllastep. Katba ka Lyngdoh Wanniang Secondary School, Marshillong pat ka la jop ïa ka Nineset Secondary School da 3 – 2 kol lyngba ka Tie Breaker namar ha ka ha ka jingïalehkai jong ka kyllamiet bad kyllastep ki la ïoh ban ïa thep mar shi kol.
Ïa ka kol na ka bynta ka Lyngdoh Wanniang Secondary School, Marshillong la ïoh ban thep da ka Ibanrilin Wanniang ha ka minit kaba 39 katba ïa ka kol jong ka Ninester Secondary School pat la ïoh da ka Ibansiewdor Lyngdoh ha ka minit kaba 59.
Haba phai pat ha ka jingïalehkai jong ki khynnah shynrang kiba hapoh ka 17 snem ka Jingïaseng Kynthei Mawkyrwat Presbytery Higher Secondary School, Mawkyrwat ka la shah rem noh ha ka Balang Mawlangwir Higher Secondary School da 2 – 0 kol lyngba ka Tie Breaker namar ha ka jingïalehkai jong ka kyllamiet bad kyllastep ki la ïoh mar kawei ka kol kata ha ka minit kaba 8 la ïoh ban thep da u Riboklang Jyrwa jong ka Balang Mawlangwir Higher Secondary School bad ha ka minit kaba 23 la thep da u Batskhem Thongni jong ka Jingïaseng Kynthei Mawkyrwat Presbytery Higher Secondary School, Mawkyrwat.
Shuh shuh ka Mawjaraiñ Presbyterian Secondary School pat ka la jop noh da 4 – 0 kol pyrshah ïa ka Rodphod Secondary School ha kaba ïa ki saw tylli ki kol la ïoh na u Pynshaidbor Snaitang ha ka minit kaba 11 bad 26 nangta na u Pynskhemlang Rngaid ha ka minit kaba 41 bad 49.
Namarkata, ha ka jingïakhun phainal jong ki khynnah shynrang kiba hapoh ka 17 snem kan long hapdeng ka Balang Mawlangwir Higher Secondary School pyrshah ïa ka Mawjaraiñ Presbyterian Secondary School bad ka Rangthong Christian Higher Secondary School pyrshah ïa ka Lyngdoh Wanniang Secondary School, Marshillong jong ki khynnah kynthei kiba hapoh ka 17 snem ka ban sa long ha ka 7 tarik mynta u bnai hapoh madan Artificial Turf, MDSA, Mawkyrwat.
