Shillong, Nailur 08 : Ka RC Evening Secondary School, Mihmyntdu, Jowai kaba mihkhmat ïa ka jylla Meghalaya ha ka kyrdan Sub-Junior Boys (U-14) ka la rung sha ka jingïalehkai quarter-final ha ka lympung ïalehkai 61st Subroto Mukherjee Cup 2022.
Ka RC Evening Secondary School ka la rung sha ka quarter-final hadien ba ka la pynbam kput da 13-0 kol pyrshah ïa ka skul na Gujarat ha ka jingïalehkai ha ka sngi Palei ha BR Ambedkar Stadium.
Ïa kitei ki 13 kol la thep da u Hamedayo Nongtdu uba la thep 4 kol, u Givenso Suting 3 kol, Samewon Khonglah bad Richan Mi-o Lyngdoh ki thep mar 2 kol nangta u Dangkermioo Ryngkhlem bad u Mar-oo P Shylla ki thep mar 1 kol.
Kumta ka RC Evening Secondary School ka la rung sha ka quarterfinal ha kaba kan sa ïakhun ha ka step jong ka sngi u Blei (11.9.2022) ïa ka team kaba jop na ka Pool D kaba don ka Jharkhand, Tripura bad ka TAFS.
Ka RC Evening Secondary School kaba don ha ka Pool C ka la sdang da ka nam jop ha katei ka lympung ha kaba ka la pynliem da 4-0 kol ïa ka skul na Maharashtra ha ka jingïalehkai ha ka sngi Balang ta ka taïew.
