Shillong, Nailar 24: Ka kynhun ki thei ïalehkai phutbol ka Meghalaya, ba la mihkhmat da ka Nongjri Presbyterian Secondary School (Ri-Bhoi), ka la khyllem noh na ka lympung ïalehkai phutbol jong ka U-17 (Girls) Subroto Cup 2025 hadien ba ka la shah rem noh da 1-0 kol ha ka jingïakhun ïa ka ïa ka QuarterFinal pyrshah ïa ka Kerala ha New Delhi hynne ka step sngi U Blei.
Shuwa kane, ka kynhun ka la pynliem ïa ka International Sports Schools Organisation, Chandigarh bad Dadra bad Nagar Haveli bad Daman bad Diu ha ka wat ïakhun jong ka Pool D ban rung sha ka QuarterFinal ha kaba ki la ïakynduh pyrshah ïa ka Kerala kaba la wan hakhlieh duh jong ka Pool C.
Haba ïakynduh pyrshah ïa ka kynhun kaba kham khlaiñ, ki khynnah kynthei jong ka Meghalaya kim shym la lah ban pynpra ïa ka kut ba skhem jong ka kynhun liang pyrshah. Ka Kerala ka la lah ban pynkhihjar tang shisien hynrei ka la biang ïa ka ban pynskhem ïa ka jingjop bad ka jaka ha ka wat ïakhun semifinal mynta u snem.
Kane ka kol ka la wan ha ka minit kaba 63 hadien ba ka goal kick kaba la shut da ka thei-ïalehkai ba shadien ka la leit beit beit sha ka nongïalehkai ka Kerala, kaba la shut kham jam sha kol. Ka nongap kol ka Meghalaya ka la ïoh ban ktah tiak ïa ka bol hynrei kawei pat ka nongïalehkai jong ka Kerala ka la ap thap ïa ka bol ba kan wanphai bad shim ïa ka kabu ba paka ban thep jlang shapoh kol.
